म. टा. प्रतिनिधी, पुणे
दुकाने, कार्यालये, हॉटेल यासमोरील पदपथाची जागा स्वच्छ ठेवण्याची जबाबदारी संबंधित व्यावसायिकांकडेच देण्यात आली असून, प्रायोगिक स्वरूपात राबविण्यात येणाऱ्या 'हम है फूटपाथी' या मोहिमेला बुधवारी गोपाळकृष्ण गोखले रस्त्यावर (एफ. सी. रोड) सुरुवात करण्यात आली. पुढील तीन महिने ही मोहीम चालणार असून, व्यवसायाच्या जागेसमोरील पदपथ सर्वाधिक काळ स्वच्छ ठेवणाऱ्या व्यावसायिकांचा विशेष सन्मान केला जाणार आहे.
पुणे महापालिका आणि 'रोटरी क्लब ऑफ पुणे लोकमान्यनगर' यांच्यातर्फे ही मोहीम सुरू करण्यात आली आहे. पालिकेतर्फे रस्ते आणि पदपथांची दररोज सकाळी स्वच्छता केली जात असली, तरी त्यानंतर दिवसभर पदपथाचा विविध कारणांसाठी वापर केला जातो. अनेकदा दुकाने किंवा हॉटेलसमोरील अस्वच्छतेमुळे ग्राहकांच्या संख्येवर परिणाम होतो. म्हणून व्यावसायिकांच्या जागेसमोरील स्वच्छतेची जबाबदारी निश्चित करून दर आठवड्याला त्याचा आढावा घेण्यासाठी ही मोहीम सुरू करण्यात आल्याची माहिती रोटरी क्लबच्या वासवी मुळ्ये यांनी दिली.
गोखले रस्त्यावरील व्यावसायिकांच्या समोरील जागेचे 'मार्किंग' सुरू करण्यात आले असून, ही जागा स्वच्छ दिवसभर स्वच्छ ठेवली जाते का? याची तपासणी पालिका आणि रोटरी क्लबच्या सदस्यांतर्फे आठवड्यातून एकदा केली जाणार आहे. त्यासाठी स्वच्छतेचे निकष ठरविण्यात आले असून, त्यानुसार या मोहिमेत सहभागी होणाऱ्या व्यावसायिकांचे गुणांकन केले जाणार आहे. सर्वाधिक गुणांकन प्राप्त करणाऱ्या व्यावसायिकांचा सन्मान केला जाणार असल्याचे महापालिकेच्या अतिक्रमण विभागाचे प्रमुख माधव जगताप यांनी सांगितले. गोखले रस्त्यासह पुढील आठवड्यात लक्ष्मी रस्ता आणि जंगली महाराज रस्त्यावरही ही मोहीम राबविण्यात येणार असल्याचे संकेत त्यांनी दिले.
.............