म. टा. प्रतिनिधी, पुणे
पुणे शहर पोलिस दलातील एका पोलिस उपायुक्तांच्या नववीत शिकणाऱ्या दोन मुलींनी करोना विरोधात लढणाऱ्या योद्ध्यांना एका व्हिडिओद्वारे सलाम केला आहे. भीती न बाळगता करोनायोद्धाच्या कर्तव्याला सलाम करू या, आपण वॉरिअर आहोत, वरिअर नाही. तेव्हा घरातच सुरक्षित राहा, असा संदेशही त्यांनी या व्हिडिओतून दिला आहे.
शरयू आणि शर्वरी घट्टे अशी या मुलींची नावे आहेत. त्या पुणे शहर पोलिस दलात विशेष शाखेतील पोलिस उपायुक्त मितेश घट्टे यांच्या कन्या आहेत. त्या दोघी इयत्ता नववीत शिकतात. मितेश घट्टे दररोज करोना आटोक्यात आणण्यासाठी सतत कार्यरत आहेत. त्यांच्या दोन्ही मुलींनी करोनाची भीती न बाळगता वडील करीत असलेल्या कामाचा त्यांना अभिमान आहे. यातूनच त्यांना व्हिडिओ तयार करण्याची प्रेरणा मिळाली. या व्हिडिओतील मजकूरही या दोघींनी लिहिला आहे.
.
गृहमंत्र्यांनीही केले कौतुक
राज्यात सध्या करोनामुळे कठीण परिस्थिती आहे. सर्वसामान्यांसह पोलिसदेखील करोनाच्या विळख्यात सापडत आहेत. नागरिकांच्या सुरक्षेसाठी अहोरात्र खंबीरपणे पोलिस एखाद्या योद्ध्याप्रमाणेच आपले कर्तव्य बजावत आहेत. आपण 'वॉरिअर्स' आहोत, 'वरिअर्स' नाही. नागरिकांनी घरातच राहून त्यांचे कर्तव्य पार पडावे. आरोग्य विभागाने दिलेल्या सूचना पाळाव्यात, मेडिटेशन करावे,' असे शरयू आणि शवर्री यांनी व्हिडिओद्वारे सांगितले आहे. राज्याचे गृहमंत्री अनिल देशमुख व राज्याचे जलसंपदा मंत्री जयंत पाटील यांनी हे व्हिडिओ स्वत:च्या फेसबुक पेजवर शेअर करत त्या दोघीचे कौतुक केले आहे.