म. टा. प्रतिनिधी, पिंपरी
'महिलांचा मान राखणे हे शिवसेनेच्या संस्कृतीत बसत नसल्याचे महिला शिवसैनिकांनी दाखवून दिले आहे. आमच्या पायातही जोडे आहेत, हे शिवसेनेने ध्यानात ठेवावे. जशास तसे उत्तर देण्याची हिंमत आमच्यातही आहे. त्यामुळे शिवसेनेने आमच्यावर पायातील जोडे हातात घेण्याची वेळ आमच्यावर आणू नये,' असा इशारा महापौर उषा उर्फ माई ढोरे यांनी शिवसेना महिला अघाडीला दिला. दरम्यान, 'या निषेध आंदोलनामागे शिवसेनेच्या काही जणांना आपली राजकीय दुकानदारी सुरू करण्याचा प्रयत्न दिसून येत आहे,' अशी टीकाही त्यांनी केली.
दोन दिवसांपूर्वी माजी मुख्यमंत्री देवेंद्र फडणवीस यांच्या पत्नी अमृता फडणवीस यांनी ट्विटरद्वारे मुख्यमंत्री उद्धव ठाकरे यांच्यावर टीका केली होती. या टीकेचा निषेध करण्यासाठी शिवसेना महिला आघाडीतर्फे अमृता यांच्या पोस्टरला जोडे मारून आंदोलन करण्यात आले होते. शिवसेना महिला आघाडीने केलेल्या या आंदोलनाचा पिंपरी-चिंचवड महापालिकेच्या महापौर माई ढोरे यांनी निषेध केला आहे; तसेच परिपत्रक प्रसिद्ध करून त्यांनी शिवसेनेवर टीकाही केली आहे.
काँग्रेसचे राहुल गांधी यांनी स्वातंत्र्यवीर सावरकर यांचा अपमान केल्यानंतर शिवसेनेने त्यांचा निषेध करायला हवा होता; परंतु या मुद्द्यावर शिवसेना सत्तेच्या लोभापायी तोंड लपवून गप्प बसली. मात्र, अमृता फडणवीस यांच्या निषेधासाठी शिवसेनेने आंदोलन केले. शिवसेनेची ही कृती निंदनीय आहे. काँग्रेससमोर शेळी झालेल्या शिवसेनेने एका महिलेचा निषेध करून आपण वाघ असल्याचे दाखविण्याचा हा केविलवाणा प्रयत्न आम्ही कधीही खपवून घेणार नाही. महिलांनीच महिलांचा मान राखयला हवा; परंतु महिलांचा मान राखण्याची शिवसेनेची संस्कृती नसल्याचे पिंपरी-चिंचवडमधील महिला शिवसैनिकांनी दाखवून दिले आहे, असे प्रसिद्धीपत्रकात नमूद करण्यात आले आहे.