क्रूरतेच्या मुद्द्यावर घटस्फोटाचा दावा मंजूर
म. टा. प्रतिनिधी, पुणे
पत्नीच्या हाताच्या मनगटाचा चावा घेणे पतीला चांगलेच महागात पडले आहे. अनेक गुन्हे दाखल असलेल्या गुंड पतीकडून होणाऱ्या त्रासाला कंटाळून क्रुरतेच्या मुद्यावर घटस्फोट मिळावा म्हणून पत्नीने दाखल केलेला अर्ज कोर्टाने मंजूर केला. फॅमिली कोर्टातील न्यायाधीश एन. आर. नाईकवडे यांच्या कोर्टाने घटस्फोट मंजूर केला.
संबंधित पती-पत्नीचे २०१४ मध्ये लग्न झाले होते. आशा आणि उमेश (दोघांची नावे बदलली आहेत.) या दोघांचा प्रेमविवाह झाला होता. त्यांना चार मुले आहेत. उमेश गुंडगिरीकडे वळल्यामुळे त्याला अनेकदा तुरुंगात जावे लागत असे. त्याच्यावर मारहाणीचे गुन्हेही दाखल आहेत. तो आशाला नेहमी शिवीगाळ करत असे. तिच्यावर संशय घेणे, लाथाबुक्क्यांनी मारहाण असे प्रकार त्याच्याकडून सातत्याने सुरू होते. संसाराला तडा जाऊ नये म्हणून आशा त्याच्याकडून होणारा त्रास सहन करत होती. सप्टेंबर २०१७ मध्ये आशाला मारहाण करताना उमेशने तिच्या उजव्या हाताच्या मनगटाचा चावा घेतला. हा चावा इतका भयंकर होता की तिच्या मनगटाची त्वचा: लोंबकळली. ससून हॉस्पिटलमध्ये तिने उपचार घेतले. या प्रकरणी तक्रार दाखल करण्यासाठी ती गेली असता पोलिसांनी दादच दिली नाही. त्यामुळे तिने 'जन-अदालत' या संस्थेकडे मदत मागितली. संस्थेतर्फे तिच्या तक्रारीबाबत पाठपुरावा करण्यात आला. त्यानंतर पोलिसांनी मारहाणीची तक्रार घेतली.
पतीकडून होणाऱ्या सततच्या त्रासामुळे तिने कोर्टात घटस्फोट मिळावा म्हणून अर्जही दाखल केला. मात्र, उमेशने कोर्टाला आपण परस्परसंमतीने घटस्फोट घेत असल्याचे सांगितले. त्यासाठी अटी- शर्ती ठरविण्यात आल्या. मात्र, त्यानंतर तो कोर्टात येण्याचे टाळू लागला. त्याच्याकडून घटस्फोट मिळावा म्हणून आशाने अॅड. सागर नेवसे यांच्यामार्फत दावा दाखल केला. अॅड. नेवसे यांनी कोर्टाला उमेशविरुद्धचे पुरावे सादर केले. त्याची पार्श्वभूमी गुंडगिरीची असल्याचे कोर्टाच्या निदर्शनास आणण्यात आले. तसेच, त्याने आशाच्या मनगटाला घेतलेल्या चाव्याचे रिपोर्ट दाखल करण्यात आले. परस्परसंमतीने घटस्फोटाच्या अटी ठरवल्यानंतरही कोर्टात हजर न राहणे, पत्नीला टाळणे हा देखील छळ असल्याचे अॅड. नेवसे यांनी कोर्टाच्या निदर्शनास आणून दिले. ते लक्षात घेऊन कोर्टाने आशाचा घटस्फोटाचा अर्ज मंजूर केला.