तातडीच्या मदतीसाठीबिनतारी संदेश यंत्रणा
म टा...
म. टा. प्रतिनिधी, पुणे
गणेश विसर्जन मिरवणुकीत आपत्कालीन परिस्थितीत तातडीने मदत उपलब्ध करून देण्यासाठी अग्निशमन दलाकडून दोन ठिकाणी 'बिनतारी संदेश मदत केंद्र' उभारण्यात आले आहेत. त्यामुळे मदतीसाठी या ठिकाणी संपर्क साधण्याचे आवाहन दलाने केले आहे.
आज, गुरुवारी गणेश विसर्जन मिरवणूक निघणार आहे; तसेच मोठ्या संख्येने घरगुती गणपतींचेही विसर्जन होणार आहे. सध्या खडकवासला धरणातून नदीत विसर्ग सुरू असल्याने पाण्याची पातळी आणि वेग तुलनेने अधिक आहे. त्यामुळे घाटांवर विशेष काळजी घेण्याचे आवाहन अग्निशमन दलाकडून केले जात आहे. होडीतून गणपती विसर्जन करताना त्यात क्षमतेपेक्षा अधिक व्यक्तींनी बसू नये; तसेच बसलेल्या व्यक्तींनी होडीस अपघात होईल, असे वर्तन करू नये, असेही दलाने सांगितले आहे. अग्निशमन दलाच्या सर्व अधिकारी आणि जवानांच्या रजा व सुट्ट्या रद्द करण्यात आल्या आहेत. १५ घाटांवर अग्निशमन दलाचे अधिकारी स्वत: उपस्थित रहाणार आहेत, अशी माहिती महापालिका प्रशासनाने दिली आहे.
\Bमदतीसाठी हेल्पलाइन\B
आपत्कालीन परिस्थितीत मदतीसाठी अग्निशमन दलाच्या १०१ हेल्पलाइनसह ०२०-२५५०१२६९ किंवा ०२०-२५५०६८०० या दूरध्वनी क्रमांकावर संपर्क साधण्याचे आवाहन केले आहे.
\Bनागरिकांसाठी महत्त्वाचे...\B
- गणेशमूर्तीचे विसर्जन करताना लहान मुलांना नदी, कॅनॉल, विहिरी, तळे यापासून दूर उभे करून त्यांच्याजवळ जबाबदार व्यक्तीने थांबावे.
- एखादी व्यक्ती पाण्यात बुडत असल्याचे निदर्शनास आल्यास, त्याची कल्पना नदीकाठी नेमलेल्या जीवरक्षकांना तातडीने द्यावी.
- मद्यपान केलेल्या अवस्थेत नदीपात्र, तलाव, कॅनॉल, विहीर, तळे इत्यादींजवळ जाऊ नये.
- नागरिकांना सुरक्षिततेच्या दृष्टीने आवश्यक त्या सूचना देण्यासाठी ध्वनिक्षेपक यंत्रणा बसविणार.
- नागरी संरक्षण दलाच्या स्वयंसेवकांकडून सूचना देण्याची व्यवस्था करण्यात आली.
- पावसामुळे नदीकाठचा परिसर निसरडा झाला असल्यास अशा ठिकाणी काळजीपूर्वक वावरावे.