'ओला'मध्ये महिलेची प्रसुती; ५ वर्ष मोफत प्रवास

मटा ऑनलाइन वृत्त । पुणे

वैद्यकीय तपासणीसाठी डॉक्टरकडे जाणाऱ्या एका महिलेने ओला कॅबमध्ये एका बाळाला जन्म दिला असल्याची घटना घडली आहे. त्यामुळे ओला कंपनीने संबंधित कुटुंबाला पाच वर्षे ओला कॅबमधून मोफत प्रवासाची भेट दिली. बाळ आणि आई दोघेही सुखरूप आहेत.

कोंढवा भागात राहणाऱ्या ईश्वरी सिंग आपल्या सासूसह वैद्यकीय तपासणीसाठी ओला कॅबने डॉक्टरांकडे जात होत्या. या दरम्यान अचानकच त्यांना प्रसुती वेदना सुरू झाल्या. रुग्णालय पाच किमीच्या अंतरावर होते. त्यामुळे या कसोटीच्या क्षणी वाहतूक कोंडीतून मार्ग काढत रुग्णालयापर्यंत पोहचण्यासाठी कॅब चालक यशवंत गलांडे प्रयत्न करत होते. अखेर रुग्णालयात दाखल होण्याआधी ईश्वरी यांनी कॅबमध्ये एका गोंडस बाळाला जन्म दिला. त्यानंतर काही वेळेतच चालक यशवंत गलांडे यांनी महापालिकेच्या कमला नेहरू रुग्णालयात दाखल केले. ईश्वरी आणि त्यांचे बाळ सुखरूप आहे. समयसूचकता दाखवल्याबद्दल चालक यशवंत गलांडे यांचे कौतुक होत असून 'ओला'ने देखील ईश्वरी आणि कुटुंबियांना कॅबची पाच वर्षासाठी मोफत सेवा देण्याची घोषणा केली आहे.