Siddharth.Kelkar@timesgroup.com
Twitter : @SiddharthkMT
पुणे : केंद्रीय मंत्री स्मृती इराणी यांच्या उत्तर प्रदेशातील अमेठी लोकसभा मतदारसंघातील विजयात 'कमळ मेंदी' या एका अनोख्या प्रचारमोहिमेचा हातभार लागला आहे. विशेष म्हणजे या प्रचारमोहिमेत सहभागी झालेल्या कलाकारांपैकी पद्मजा लाखे आणि उषा वाजपेयी या दोघी पुण्याच्या आहेत. या दोघी सुमारे आठवडाभर या अनोख्या प्रचारमोहिमेत सहभागी झाल्या होत्या.
पद्मजा लाखे या मुळात चित्रकार आणि शिल्पकार आहेत. भारतीय जनता पक्षाच्या महिला आघाडीच्या अध्यक्ष विजया रहाटकर यांच्याशी त्यांची कलेच्या संदर्भातच ओळख झाली. लोकसभा निवडणुकीच्या प्रचारात भाजपच्या समर्थक; पण कलाकार म्हणून सहभागी होता येईल का, अशी लाखे यांना उत्सुकता होती. रहाटकर यांच्याशी त्या संदर्भात बोलणे झाले असता, त्यांनी लाखे यांना वाराणसी आणि अमेठी येथील प्रचारमोहिमेत सहभागी होता येईल, असे सुचवले. त्यानंतर लाखे आणि त्यांच्या सहकारी वाजपेयी या स्वखर्चाने या मोहिमेत सहभागी झाल्या. अमेठीत त्यांनी आशा वाजपेयी यांच्या मार्गदर्शनाखाली काम केले.
'आम्ही दोन आठवडे उत्तर प्रदेशात होतो. तेथे वाराणसी आणि अमेठी या दोन ठिकाणी आम्ही काही उपक्रमांत सहभागी झालो. अमेठीमध्ये, विशेषत: तेथील महिलांशी संपर्क साधण्यासाठी 'कमळ मेंदी' नावाची अनोखी प्रचारमोहीम आखण्यात आली होती. यामध्ये गावातील स्त्रियांच्या गटात सहभागी होऊन त्यांच्या हातावर कमळाची मेंदी काढायची, असे त्याचे स्वरूप होते. मूळ हेतू मात्र होता, तो मेंदीच्या निमित्ताने या स्त्रियांशी संवाद साधून त्यांच्यापर्यंत केंद्रातील आणि उत्तर प्रदेशातील भाजप सरकारचे काम पोहोचवणे. आमच्यासारख्या शहरांतून आलेल्या स्त्रियांशी तेथील स्त्रिया लगेच 'कनेक्ट' होणार नाहीत, हे जाणून मेंदीच्या माध्यमातून त्यांच्याशी संपर्क साधण्याचा हा अनोखा प्रयोग होता. मेंदीच्या निमित्ताने हातात हात घेतल्याने निर्माण झालेला स्नेह त्यांनी बोलते करण्यासाठी उपयोगी पडला,' असे निरीक्षण लाखे यांनी नोंदवले.
त्या म्हणाल्या, 'मेंदीच्या निमित्ताने आम्ही स्त्रियांशी गप्पा मारायला लागलो, तसे तेथील प्रश्न समोर येत गेले. त्याचबरोबर उज्ज्वला योजनेमुळे घरात आलेला गॅस सिलिंडर आणि शेगडी, विजेचे कनेक्शन, ग्रामसडक योजनेत झालेले रस्ते यामुळे त्या सरकारबाबत समाधानी होत्या, हेही समजले. विशेष जाणवले, ते म्हणजे घरात शौचालय आल्याने त्यांची झालेली सोय. या शौचालयाला त्या 'इज्जतघर' असे संबोधत होत्या. त्यामुळे आपली कुंचबणा थांबल्याचे अनेक जणींनी सांगितले. शिवाय शेतकरी सन्मान योजनेंतर्गत आपल्या खात्यांत दोन हजार रुपये जमा झाले आहेत, असेही अनेकींनी सांगितले.'
स्वखुशीने, स्वखर्चाने सहभाग
भाजप उमेदवारांच्या प्रचारमोहिमेत देशभरातच अनेकजण कार्यकर्ते नसूनही स्वखुशीने आणि स्वखर्चाने सहभागी झाले होते. अमेठीतही असे काही जण भेटल्याचे पद्मजा लाखे यांनी नमूद केले. अमेठीत आसपासच्या गावांतील भाजपच्या कार्यकर्त्यांसह पिंपरी-चिंचवड येथील काही जण सहभागी झाले होते, असे त्यांनी सांगितले. अमेठीच्या महाराणी गरिमासिंह यांनी प्रचारमोहिमेत सहभागींनी सहकार्य केले, असेही लाखे म्हणाल्या.