म. टा. प्रतिनिधी, पुणे
सावित्रीबाई फुले पुणे विद्यापीठ, करिअर कौन्सेलिंग ग्रुप, इन्स्टिट्यूट ऑफ चार्टर्ड अकाउंटंटस् ऑफ इंडिया (आयसीएआय), डब्ल्यूआयआरसी यांच्या वतीने वाणिज्य विद्याशाखेत पदवी (तृतीय वर्ष, बीकॉम) आणि पदव्युत्तर (एमकॉम भाग २) शिक्षण घेत असलेल्या विद्यार्थिनींसाठी वस्तू व सेवा करासंदर्भात (जीएसटी) कार्यशाळा आयोजित करण्यात आली आहे. वस्तू व सेवा कर (जीएसटी) - कौशल्य विकासाच्या माध्यमातून विद्यार्थिनींचे सक्षमीकरण ही कार्यशाळा गरवारे कॉमर्स कॉलेज, मॉडर्न कॉलेज, बीएमसीसी, नेस वाडिया कॉमर्स कॉलेज, एसपी कॉलेज, सेंट मीराज कॉलेज ऑफ गर्ल्स अणि एमएसीसी या कॉलेजांमध्ये आयोजित केली आहे.
ही कार्यशाळा १ जुलै रोजी होणार आहे. उद्घाटनाच्या सत्रास राष्ट्रपती रामनाथ कोविंद हे वेब कास्टिंगद्वारे संबोधित करणार आहेत. यानंतर प्रत्येक आठवड्यातील शनिवारी (७, १४, २१, २८ जुलै) सकाळी ८ ते १२ या वेळात या कार्यशाळेतील विविध सत्रे आयोजित करण्यात आली आहेत. या विषयांच्या अभ्यासासाठी आवश्यक असणारे साहित्य आयसीएआयकडूनच पुरविले जाणार आहे. जुलै महिन्यात या संघटनेच्या स्थापनेस ७० वर्षे पूर्ण होत आहेत. या पार्श्वभूमीवर महिला सक्षमीकरणाची संकल्पना केंद्रस्थानी ठेवून ही कार्यशाळा आयोजित केली आहे, अशी माहिती विद्यापीठाचे अधिष्ठाता डॉ. प्रफुल्ल पवार व उपकुलसचिव एम. व्ही. रासवे यांनी दिली. या कार्यशाळेत सहभागी होण्यासाठी विद्यार्थिनींकडून अल्पोपहार आणि लेखन-साहित्यासाठी नाममात्र १०० रुपये इतके शुल्क आकारले जाणार आहे. या कार्यशाळेत विद्यार्थिनींना इनपुट टॅक्स क्रेडिट, इन्व्हॉइस अँड रेकॉर्डस्, जीएसटी रिटर्न्स, कलेक्शन ऑफ जीएसटी अशा अनेक विषयांवर मार्गदर्शन केले जाणार आहे. या कार्यशाळेसाठी सर्व कॉलेजच्या प्राचार्यांनी त्यांच्या कॉलेजात पदवी किंवा पदव्युत्तर विद्यार्थिनींची माहिती कॉलेजच्या लॉग इन आयडीचा वापर करून भरावयाची आहे. या कार्यशाळेत प्रत्येक कॉलेजातून १० निवडक विद्यार्थिनींना प्रवेश घेता येणार आहे. कार्यशाळेत सहभागी विद्यार्थिनींना ई-लर्निंग प्रशस्तिपत्र दिले जाणार आहे.