म. टा. प्रतिनिधी, पुणे
अंधांनाही चित्रे 'दाखवणारा' चित्रकार म्हणून एक अनोखी ओळख मिळवणारे पुण्यातील चित्रकार म्हणजे चिंतामणी हसबनीस! कधी दृक्-श्राव्य, तर कधी ब्रेल लिपीचे कोरीव काम करत चित्रे साकारणाऱ्या आपल्या मित्राची ही कला जगभरातील सर्व अंधांपर्यंत पोहोचावी, यासाठी हसबनीस यांच्या शालेय मित्रांनी एकत्र येत 'दृष्टी-स्पर्श आर्ट फाउंडेशन'ची स्थापना केली आहे. यामुळे आता अंधांपुढे एक नवे जग 'दृश्यमान' होऊ शकणार आहे.
या फाउंडेशनचे उद्घाटन उद्या, गुरुवारी (२१ जून) सायंकाळी ६.३० वाजता बाल शिक्षण मंदिराच्या सभागृहात (मयूर कॉलनी) होणार आहे. ख्यातनाम नेत्ररोगतज्ज्ञ डॉ. तात्याराव लहाने यांच्या प्रमुख उपस्थितीत होणाऱ्या या कार्यक्रमास 'नॅशनल असोसिएशन फॉर द वेल्फेअर ऑफ फिजिकली चॅलेंज्ड' या संस्थेचे संस्थापक राहुल देशमुख, अभिनेत्री मृणाल कुलकर्णी आणि फाउंडेशनचे संचालक हसबनीस व त्यांचे मित्र उपस्थित असतील.
कलेच्या माध्यमातून दृष्टीहीन व्यक्तींचे सक्षमीकरण हे फाउंडेशन स्थापनेचे उद्दिष्ट आहे. 'दृष्टी'पेक्षा 'दूरदृष्टी' आवश्यक आहे. समाजातील बहुसंख्य लोकांना दृष्टी असूनही ते संपूर्ण आयुष्य कोणत्याही दृष्टिकोनाशिवायच व्यतीत करतात. लौकिकार्थाने अंध असूनही विशाल दृष्टिकोन असणाऱ्या अनेक व्यक्ती समाजात दिसतात. दृष्टी-स्पर्श आर्ट फाउंडेशनमध्ये अंध व्यक्तींच्या याच ताकदीचा कलेच्या माध्यमातून वापर करून त्यांना समाजात सहज मिसळता येईल, अशा प्रकारची कौशल्ये शिकवली जातील.
- चिंतामणी हसबनीस, चित्रकार