नाट्यगृहाचे वैभव हरवले

पुणे : शहरातील सांस्कृतिक कार्यक्रमांसाठी पहिली पसंती बालगंधर्व रंगमंदिराला असते, तर त्यानंतर क्रमांक लागतो तो यशवंतराव चव्हाण नाट्यगृहाचा. कोथरूडमधील रसिकांमुळे यशवंतराव चव्हाण नाट्यगृहातील कार्यक्रमांना नेहमीच गर्दी असते. येथील कार्यक्रमाला रसिक नाहीत, असे सहसा होत नाही; पण महापालिकेच्या कारभारामुळे आणि व्यवस्थापनाच्या ढिसाळपणामुळे या नाट्यगृहाचीही रया गेली असून नाट्यगृहाचे वैभव हरवले आहे.

बालगंधर्व रंगमंदिरानंतर यशवंतराव चव्हाण नाट्यगृहाला पसंती दिली जाते. येथे कार्यक्रमाला गर्दी होत असल्याने अनेकजण या नाट्यगृहालाच पहिली पसंती देतात. एक हजारच्या आसपास असलेली आसन क्षमता, पार्किंग, टोलेजंग इमारत, पुरेशी मोकळी जागा यामुळे कलाकारांसाठी हे नाट्यगृह हक्काचे ठिकाण आहे. कोथरूडमध्ये मोठ्या प्रमाणात रसिकवर्ग असल्याने गर्दी जमविण्यासाठी आयोजकांना कसरत करावी लागत नाही. मात्र, नाट्यगृहाचा दर्जा कायम राखण्यात पालिका कमी पडू लागली असून त्याचा त्रास कलाकार व रसिकांना सहन करावा लागत आहे.

मध्यंतरी अभिनेत्री मुक्ता बर्वे यांनी येथील अस्वच्छतेचे फोटो सोशल मीडियावर प्रसिद्ध केल्यामुळे स्वच्छतेचा विषय समोर आला होता. व्यवस्थापनाच्या आणि पालिकेच्या कारभारावर टीका झाल्यानंतर स्वच्छताकामासाठी निविदा प्रक्रियाही राबविण्यात आली. मात्र, ही तात्पुरती मलमपट्टी ठरली आहे. प्रेक्षागृहाला बालगंधर्व रंगमंदिराप्रमाणे ओंगळ स्वरूप आले आहे. प्रेक्षागृहात प्रसन्न वातावरण अनु‍‍भवण्यास येत नाही. बालगंधर्व रंगमंदिराप्रमाणे येथेही डास आणि उंदरांचा उच्छाद असतो. स्वच्छतागृहांमध्ये नाक दाबूनच जावे लागते. रंगमंचाच्या मागेही स्वच्छता नसते. तसेच येथील कलादालन कित्येक दिवसांत उघडलेलेच नाही.

पार्किंगसाठी प्रशस्त जागा ही या नाट्यगृहाची ओळख होती; पण आता रसिकांना आपले वाहन बाहेरच लावावे लागत आहे. या नाट्यगृहाच्या परिसरात आणखी एक नाट्यगृह बांधले जात असून त्या कामाचा राडारोडा इतरत्र पडलेला दिसून येतो. या कामामुळे पार्किंगची जागा कमी झाली आहे. बांधकामामुळे येथे धुळीचे साम्राज्य निर्माण झाले आहे. येथील काम लवकरात लवकर पूर्ण करून नाट्यगृह आणि परिसर स्वच्छ करावा, अशी मागणी कलाकार व रसिक करत आहे.

नाट्य परिषदेला ‘ना खंत ना खेद’

शहरातील नाट्यगृहांची दुरवस्था झालेली असताना अखिल भारतीय मराठी नाट्य परिषदेच्या पुणे व कोथरूड शाखा मौन बाळगून असल्यामुळे नाट्यक्षेत्रात नाराजीचे वातावरण आहे. नाट्यगृहांच्या दुरवस्थेबद्दल कलाकार जाहीरपणे भूमिका घेत असताना नाट्य परिषदेची भूमिका ‘नरो वा कुंजरो वा’ अशी राहिली आहे. कोथरूड शाखेचे कार्यालय यशवंतराव चव्हाण नाट्यगृहात असले, तरी या शाखेने येथील कारभाराविरुद्ध कधीही तक्रार केली नाही. परिषदेची पुणे शाखा सर्व आघाड्यांवर थंड आहे. पुणे शाखेचे कार्यालय टिळक स्मारक मंदिरात असूनही तेथील अस्वच्छतेविषयी परिषदेने कधीही भूमिका घेतलेली नाही.