​ योग परीक्षेचा निकाल रखडला

म. टा. प्रतिनिधी, येरवडा

येरवडा मध्यवर्ती कारागृहात अनेक दिवसांपासून नियमित योग करून योगाभ्यास परीक्षा दिली. पण, वर्षभरानंतरही योगाभ्यास परीक्षेचा निकाल लागला नाही. राज्याच्या कारागृह महानिरीक्षकांनी पश्चिम विभागाच्या उपमहानिरीक्षकांना सूचना देऊनही योगाभ्यास परीक्षेचा निकाल जाहीर झाला नाही. योग परीक्षेत उत्तीर्ण होणाऱ्या कैद्यांची शिक्षा कमी होणार असल्याने नियमित योग करून परीक्षेला बसलेल्या कैद्यांचे लक्ष निकालाकडे लागले आहे. त्यामुळे या निकालाबाबत कैद्यांना उत्सुकता आहे.

जागतिक योग दिनाचे औचित्य साधून वर्षभरापूर्वी मध्यवर्ती कारागृहात योग अभ्यासक्रम परीक्षा योजना जाहीर करण्यात आली होती. त्यानुसार कारागृहात नियमित योग करून जे बंदिवान परीक्षा उत्तीर्ण होतील, त्यांना झालेल्या शिक्षेपैकी काही दिवस अथवा काही महिन्यांची विशेष माफी देण्याचा निर्णय प्रशासनातर्फे घेण्यात आला. त्यानुसार येरवडा कारागृहात गेल्या वर्षभरापासून कैद्यांनी योगाची तयारी केली होती. कारागृहातील शिक्षा झालेल्या सुमारे १३० पुरुष आणि महिला कैद्यांनी योगाभ्यासाला सुरुवात केली. अभ्यासक्रम पूर्ण झाल्यानंतर प्रशासनाकडून दोन टप्प्यांत परीक्षा घेण्यात आली.

‘पतंजली योग गुरू’मार्फत कारागृहात पहिल्या टप्प्यात लेखी, तर काही महिन्यांनी दुसऱ्या टप्प्यात प्रात्यक्षिक परीक्षा घेण्यात आली. परीक्षा संपल्यावर कैद्यांच्या पेपरची तपासणी पूर्ण होऊन तीन चार महिन्यांचा कालावधी लोटला आहे. अद्याप या परीक्षेचा निकाल प्रशासनाने जाहीर केलेला नाही. त्यामुळे परीक्षार्थी कैद्यांचे लक्ष निकालाकडे लागले आहे.

जागतिक योग दिनानिमित्त कारागृह महानिरीक्षक डॉ. भूषणकुमार उपाध्याय २१ जून रोजी येरवडा कारागृहात योग दिन साजरा करण्यासाठी आले होते. त्या वेळी मागील वर्षी घेतलेल्या योगाभ्यास परीक्षेचा लवकरच निकाल घोषित करण्याचे वचन त्यांनी योग करणाऱ्या आठशे कैद्यांना दिले. त्याबाबतचे अधिकार पश्चिम विभागाच्या उपमहानिरीक्षक स्वाती साठे यांना दिले असल्याचे सांगितले होते.