खाणीत उडी घेऊन तरुणाची आत्महत्या

म. टा. प्रतिनिधी, येरवडा
घरातून दोन दिवसांपूर्वी बेपत्ता झालेल्या तरुणाने धानोरी येथील खाणीतील पाण्यात उडी मारून आत्महत्या केल्याची घटना बुधवारी सकाळी उघडकीस आली. स्थानिक नागरिकांनी तरुणाचा मृतदेह पाण्यात तरंगत असल्याची माहिती पोलिसांना दिली. त्यानंतर अग्निशमन दलाच्या मदतीने तरुणाचा मृतदेह बाहेर काढण्यात आला.

संजोग थोकोबा वाघमारे (वय ३६, रा. लक्ष्मी सत्यम रेसिडेन्सी, धानोरी) असे आत्महत्या केलेल्या तरुणाचे नाव आहे. याप्रकरणी विश्रांतवाडी पोलिस ठाण्यात घटनेची नोंद करण्यात आली आहे.

संजोग हा धानोरीत राहण्यास असून रोज रात्री जेवण केल्यानंतर शतपावली करण्यासाठी जात होता. रविवारी रात्री जेवण करून नेहमीप्रमाणे बाहेर फिरण्यासाठी गेला. रात्री अकराच्या सुमारास मोबाइलवरून आईला फोन करून घरी येणार नसून मित्राकडे मुक्कामाला जात असल्याचे त्याने सांगितले होते.

संजोग सोमवारी सकाळी घरी परतला नाही म्हणून कुटुंबीयांनी विश्रांतवाडी पोलिस ठाण्यात माहिती दिली होती. दोन दिवस उलटल्यानंतर बुधवारी सकाळी धानोरी खाणीतील पाण्यात एका तरुणाचा मृतदेह तरंगताना काही स्थानिक नागरिकांनी दिसला. त्यांनी या घटनेची माहिती पोलिसांना दिली. काही वेळातच पोलिस आणि अग्निशमन दलाचे कर्मचारी घटनास्थळी पोहचले. अग्निशमन दलाच्या कर्मचाऱ्यांनी बोटीच्या मदतीने तरुणाचा मृतदेह बाहेर काढला, अशी माहिती पोलिस उपनिरीक्षक अभिजित चौगुले यांनी दिली. संजोग हा विवाहित असून त्याच्या पश्चात आई, पत्नी, एक भाऊ आणि बहीण असा परिवार आहे.

पंधरा दिवसांत तीन आत्महत्या

पंधरा दिवसांपूर्वीच विश्रांतवाडी परिसरात राहणारा सनी जगताप आणि येरवड्यात राहणारी शीतल गायकवाड या प्रेमी युगलाने प्रेमप्रकरणातून धानोरी खाणीतील पाण्यात उडी मारून आत्महत्या केल्याची घटना घडली होती. त्यानंतर रविवारी संजोग वाघमारे या तरुणाने पाण्यात उडी मारून जीवन संपविले.