युवक काँग्रेसतर्फे पर्णकुटी चौकात आंदोलन

म. टा. प्रतिनिधी, येरवडा
नगर जिल्ह्यातील कोपर्डी येथील अल्पवयीन मुलीवर झालेल्या बलात्कार व खुनातील आरोपींचा खटला जलद गती कोर्टात चालवून फाशीची शिक्षा करावी या मागणीसाठी पुणे शहर युवक काँग्रेसच्या वतीने पर्णकुटी चौकात आंदोलन करण्यात आले.
‘माणुसकीला काळिमा फासणारी घटना असून, आरोपी समाजात राहण्याच्या लायकीचे नाहीत. बलात्काराचा खटला जलदगती कोर्टात चालवून फाशीची शिक्षा देण्यासाठी प्रयत्न करावेत अशी मागणी मुख्यमंत्र्यांकडे करणार आहे. मुख्यमंत्री देवेंद्र फडणवीस यांनी तातडीने गृहखात्याच्या राजीनामा देऊन राज्याला पूर्ण वेळ असणारा गृहमंत्री द्यावा,’ अशी मागणी शहर अध्यक्ष विकास लांडगे यांनी केली.
हा खटलाजलदगती कोर्टात चालवावा अशी मागणी सरचिटणीस सचिन सातपुते यांनी केली. आंदोलनाचे आयोजन पुणे शहर महासचिव राहुल शिरसाठ, पुणे शहर सरचिटणीस श्रीकांत राजगुरू, सुनील घारे, विशाल गोरे, प्रणय कांबळे, अभिजीत रोकडे, रुणेश कांबळे यांनी केले होते. या वेळी मोठ्या संख्येने कार्यकर्ते उपस्थित होते.