म. टा. प्रतिनिधी, पुणे
'भारतीय रागदारी गायनाची ओळख बनून गेलेल्या आणि स्वत: एक परंपरा झालेल्या किशोरी आमोणकर' ही श्रोत्यांच्या हृदयातील ओळख अढळ असताना किशोरीताई रविवारी नव्याने गवसल्या. किशोरीताई किती श्रेष्ठ दर्जाच्या गझल रचनाकार होत्या याचा अंदाज रसिकांना किशोरीताईंच्या गझल रचनांनी आला. किशोरीताई आता नसल्या तरी त्या प्रत्येक गझलेतून भेटत होत्या. अगदी प्रत्येक गझल 'जमाना याद तेरा' असे म्हणून किशोरीताईंना अभिवादन करत होती. ऐरवी कंटाळवाणी भासणारी रविवारची दुपार 'अनसंग किशोरीताई' मैफलीने ताजी, टवटवीत आणि श्रोत्यांना अनुभवसिद्ध करणारी होती.
नाट्य संपदा प्रतिष्ठानतर्फे पद्मविभूषण गानसरस्वती किशोरी आमोणकर यांच्या भारतीय शास्त्रीय संगीतातील योगदानाला मानवंदना देण्यासाठी आयोजित आठव्या 'गानसरस्वती महोत्सवा'चा रविवारी दिमाखात समारोप झाला. 'गझलाकार किशोरीताई' हा नवीन अन्वयार्थ शोधून रसिकांची पावले वळाली. किशोरीताईंचे शास्त्रीय गायकीवरील प्रभुत्व जगाने मान्य केले. मात्र, या पलीकडे असलेले काही पैलू पं. रघुनंदन पणशीकर व विदुषी देवकी पंडित यांच्या स्वरांमधून आविष्कृत झाले.
'अनसंग किशोरीताई' या कार्यक्रमात किशोरीताईंच्या बहुआयामी प्रतिभेचा वेध घेत, त्यांच्या दुर्मिळ रचना-विशेषत्वाने गझल सादर झाल्या. किशोरीताईंच्या आठवणींना उजळा देत त्यांच्या अप्रतिम रचनांचे सादरीकरण असा आस्वाद रसिकांनी घेतला. 'हम वो गुल हैं', 'दूर से आये ते साथी', 'ये महोबत तेरे अंजाम पे रोना आया', 'दिल को बहलाने', 'जुल्म के शब', 'दिल में अब यू तेरे', 'जिंदगी क्या हैं', 'फुलो के इश्तियात में', 'देखा जिन्होने', 'दिल दिया आपने ये मेहरबानी आपकी', 'जमाना याद तेरा', 'करीब मौत खडी हैं' आणि 'मौजो ने भी दिया हैं सहारा कभी कभी' या गझलांनी रसिकांच्या हृदयाचा ठाव घेतला. अमित चौबे (तबला), अनय गाडगीळ (की-बोर्ड), निनाद सोलापूरकर (हार्मोनियम), रोहन व्हनगे (तालवाद्य), तन्मय पवार (गिटार) यांनी साथसंगत केली.
सकाळच्या सत्राची सुरुवात तरुण गायक अर्शद अली यांच्या गायनाने झाली. बेलवलकर कलामंच पुरस्कृत 'गानसरस्वती किशोरी आमोणकर युवा पुरस्कार' अली यांना अजित बेलवलकर यांच्या हस्ते प्रदान करण्यात आला. या वेळी निहार आमोणकर उपस्थित होते. भार्गवी वेंकटराम यांनी कर्नाटकी शैलीतील गायनाने भारावून टाकले. महोत्सवाच्या समारोपाच्या सत्रात सायंकाळी सावनी शेंडे-साठ्ये यांचे बहारदार गायन, सितारा देवी यांचे नातू विशाल कृष्ण यांचा कथक नृत्याविष्कार रंगला. महोत्सवाची सांगता पं. रघुनंदन पणशीकर यांच्या शास्त्रीय गायनाने झाली. राहुल सोलापूरकर यांच्या खुमासदार निवेदनाने रंगत वाढली.