UPमध्ये कर्जमाफी मग महाराष्ट्रावर अन्याय का?

मटा ऑनलाइन वृत्त । मुंबई

उत्तर प्रदेशमध्ये योगी आदित्यानाथ यांनी शेतकऱ्यांचे कर्ज माफ केल्यानंतर महाराष्ट्रातही शेतकऱ्यांच्या कर्जमाफीची मागणी जोर धरू लागली आहे. ' महाराष्ट्रातील शेतकऱ्यांच्या आत्महत्यांची परिस्थिती उत्तर प्रदेशपेक्षा गंभीर असतानाही राज्य सरकार शेतक-यांना कर्जमाफी देत नाही. हा महाराष्ट्रातील शेतक-यांवर अन्याय आहे', अशी संतप्त प्रतिक्रिया विरोधी पक्षनेते राधाकृष्ण विखे पाटील यांनी व्यक्त केली.

' गेल्या अडीच वर्षांत नऊ हजार शेतक-यांच्या आत्महत्यांचा दुर्दैवी उच्चांक झाला आहे. राज्यातील शेतकरी सरकारच्या नावे पत्र लिहून आत्महत्या करत आहेत, असंख्य शेतक-यांनी मृत्यूपूर्वी लिहिलेल्या पत्रामध्ये सरकारने कर्जमाफी करावी, अशी अंतिम इच्छा व्यक्त केली. मात्र तरीही हे सरकार शेतकरी कर्जमाफी करत नाही' अशा शब्दांत विखे-पाटील यांनी सरकारवर टीका केली.

भाजपचे केंद्र सरकार महाराष्ट्राच्या कर्जमाफीसाठी मदत करण्याची ठोस भूमिका घेत नाही. या परिस्थितीत उत्तर प्रदेशातील शेतक-यांना जाहीर झालेली कर्जमाफी म्हणजे महाराष्ट्रातील शेतक-यांच्या जखमांवर मीठ चोळण्यासारखे आहे. या दुजाभावाविरोधात शेतकरी रस्त्यावर उतरल्याशिवाय राहणार नाही, असा इशाराही त्यांनी दिला.