मुंबई-गोवा हायवेवर चार लाखांची गोवा मेड दारु नेताना पकडलं, स्कोडा कारसह चालक ताब्यात

रायगड : कोकणात स्कोडा कारमधून विदेशी गोवा बनावटीच्या दारु वाहतूक करणं चालकाला चांगलंच महागात पडलं. मुंबई गोवा राष्ट्रीय महामार्गावरील पोलादपूर तालुक्यात धामणदिवी येथे महाड राज्य उत्पादन शुल्क विभागाने धडक कारवाई करत एकाला अटक केली आहे. स्कोडा कारसह 4 लाख 18 हजार रूपयांची गोवा बनावटीची दारू हस्तगत करण्यात आली.

मंगळवारी रात्री उशिरा स्कोडा कारमधून एक व्यक्ती विदेशी गोवा बनावटीची दारू वाहतूक करणार असल्याची खात्रीशीर माहिती मिळाल्याने महाड राज्य उत्पादन शुल्क विभागाकडून धामणदिवी येथे सापळा रचण्यात आला. मध्यरात्री दोन वाजण्याच्या सुमारास ही स्कोडा कार आढळून आल्यावर कार थांबवून (हेमंत चंद्रकांत चंद्रशेखर रेडकर रा. देऊळवाडी, शिरोडा सिंधुदुर्ग) यालाही अटक करून ताब्यात घेण्यात आले आहे.

या कारवाईमध्ये महाड विभागाचे निरिक्षक ए. आर. भोसले, दुय्यम निरिक्षक एस. पी. जाधव, माणगाव विभाग दुय्यम निरीक्षक डी. वाय. वाडेकर, जवान सी. एम. भोई, भगत, महाले आदी प्रत्यक्ष भाग घेतला. महाड राज्य उत्पादन शुल्क विभागाचे दुय्यम निरिक्षक एस.पी.जाधव हे अधिक तपास करीत आहेत.

हेही वाचा : बाबा, मी स्कूटीसह दरीत पडलोय, मुंबई-पुणे महामार्गावर काळोख्या रात्रीचा थरार, अखेर...

पोलादपूर तालुक्यातील ग्रामीण भागामध्ये गोवा बनावटीची विदेशी दारू मोठया प्रमाणात विक्री होत असून या कारवायांप्रमाणेच स्थानिक ग्रामीण भागातील कारवायांमध्ये अटक करण्यात आलेल्या एका आरोपीस गोवा येथील खेपा वारंवार घडू नयेत, यासाठी एका ग्रामपंचायतीमार्फत खोटा मृत्यूचा दाखला तयार करून सहकार्य केल्याचीही धक्कादायक माहिती सुत्रांनी दिली आहे

हेही वाचा : विवाहाच्या तोंडावर लग्नघराला आग, बस्ता पेटला, लाखोंची रोकड भस्मसात, स्वप्नांची राख