नीलेश राणे अखेर पोलिसांना शरण

मटा ऑनलाइन वृत्त । चिपळूण (रत्नागिरी)

काँग्रेसचे चिपळूण तालुकाध्यक्ष संदीप सावंत यांचं अपहरण करुन त्यांना मारहाण केल्याप्रकरणी काँग्रेस नेते नारायण राणे यांचे पुत्र, माजी खासदार नीलेश राणे अखेर आज चिपळूण पोलिसांपुढे शरण आले. नीलेश यांना अटक करण्यात आली असून थोड्याच वेळात त्यांना न्यायालयात हजर केले जाणार आहे.

संदीप सावंत यांना २४ एप्रिल रोजी मारहाण करण्यात आली होती याप्रकरणी अटक टाळण्यासाठी नीलेश राणे यांनी मुंबई उच्च न्यायालयात धाव घेतली होती. मात्र १७ मे रोजी त्यांचा अटकपूर्व जामीन अर्ज न्यायालयाने फेटाळून लावला होता. त्याचवेळी २३ मेपर्यंत पोलिसांना शरण जाण्याचे आदेशही नीलेश यांना देण्यात आले होते. त्यामुळे पोलिसांना शरण जाण्याची तयारी दाखवून नीलेश यांच्यावतीने करण्यात आलेला अर्ज मागे घेण्यात आला होता.

दरम्यान, कोर्टाच्या आदेशानुसार नीलेश राणे आज चिपळूण पोलीस ठाण्यात हजर झाले. त्यानंतर त्यांना अटक करण्यात आली असून त्यांची वैद्यकीय तपासणीही करण्यात आली आहे. पोलीस दुपारी त्यांना न्यायालयात हजर करणार आहेत.