कणकवली: स्वाभिमान-भाजप कार्यकर्ते भिडले

कणकवली :

महाविद्यालयीन विद्यार्थ्यांना झालेल्या मारहाणीचं पर्यवसान आज दुपारी स्वाभिमान गट आणि माजी नगराध्यक्ष संदेश पारकर गट या दोन गटांच्या राड्यात झाले. कणकवली नगराध्यक्ष निवडणुकीनंतर हा वाद काहीसा धुमसत होता. आज सकाळी पारकर यांची सोशल साइटवरुन बदनामी केल्याच्या संशयावरून महाविद्यालीयन विद्यार्थ्यांना मारहाण झाली आणि त्यानंतर स्वाभिमानच्या गटाने पारकर यांच्या घरावर हल्ला केला. घरासमोरील गाड्यांची तोडफोड करण्यात आली.

शीघ्र कृती दलाच्या दोन तुकड्या कणकवलीत तैनात आहे. पोलीस अधिक तपास करत आहेत. शहरात काहीशी तणावपूर्ण परिस्थिती आहे. परस्परविरोधी तक्रारी दाखल झाल्या आहेत. संदेश पारकर यांचे बंधू आणि माजी उपनगराध्यक्ष कन्हैय्या पारकर यांनी स्वाभिमानच्या कार्यकर्त्यांविरुद्ध तक्रार दाखल केली आहे आणि स्वाभिमान गटानेही पारकर गटाविरुद्ध तक्रार केली.

पारकर यांच्या घरावर झालेल्या हल्ल्यानंतर राजकीय वातावरण तापले असून शिवसेनेचे आमदार वैभव नाईक यांनी पारकर यांच्या घरी भेट दिली. स्वाभिमान पक्षाचा दहशतवाद खपवून घेतला जाणार नाही असा इशारा देऊन दोषींवर कठोर कारवाईची मागणी केली. नगराध्यक्ष समीर नलावडे यांनी पारकर गटाचा दहशतवाद मोडून काढण्याचा इशारा दिला आहे. भाजप नेते संदेश पारकर यांच्या घरावर पोलिस बंदोबस्त ठेवण्यात आला आहे. पोलिस निरीक्षक शिवाजी कोळी अधिक तपास करीत आहेत.