सिंधुदुर्ग:डंपरमालकांचं आदोलन, नितेश राणे ताब्यात

मटा ऑनलाइन वृत्त । सिंधुदुर्ग

सिंधुदुर्गात आपल्या विविध मागण्यांसाठी डंपरमालकांनी आज, शनिवारी सकाळपासून सुरू केलेल्या आंदोलनाला दुपारी हिंसक वळण लागले. काँग्रेसचे आमदार नितेश राणे यांच्या नेतृत्वाखाली डंपरमालक जिल्हाधिकारी कार्यालयात घुसले. त्यांनी तोडफोड केली. त्यामुळे पोलिसांनी लाठिमार केला. दरम्यान पोलिसांनी आमदार राणे यांना ताब्यात घेतले.

आंदोलन करणाऱ्या डंपरमालकांनी सकाळपासूनच सिंधुदुर्ग - गोवा महामार्ग रोखून धरला. यामुळे महामार्गावर प्रचंड वाहतूक कोंडी झाली होती. स्थानिक पोलीस आणि महसूल विभागाकडून होत असलेल्या कारवाईचा त्रास होत असल्याने जिल्हाधिकाऱ्यांनी यावर तातडीने चर्चा करून तोडगा काढावा, अशी मागणी यावेळी आंदोलनकर्त्यांनी केली. मात्र जिल्हाधिकाऱ्यांकडून कोणताही प्रतिसाद न मिळाल्याने डंपरचालकांनी दुपारच्या सुमारास आमदार राणेंच्या नेतृत्वाखाली जिल्हाधिकारी कार्यालयात घुसून आंदोलन करण्याचा प्रयत्न केला. पोलिसांनी हस्तक्षेप करून त्यांना रोखले. त्यामुळे संतप्त झालेल्या आंदोलनकर्त्यांनी कार्यालयाचे प्रवेशद्वार तोडण्याचा प्रयत्न केला. तसेच तिथे असलेल्या गाड्यांवर दगडफेक केली. अखेर जमावाला पांगवण्यासाठी पोलिसांनी लाठिमार केला. तसेच पोलिसांनी नितेश राणे यांना ताब्यात घेतले.

डंपरमालकांच्या मागण्यांसदर्भात चर्चा करून तोडगा काढावा, यासाठी जिल्हाधिकाऱ्यांच्या भेटीची वेळ मागितली होती. पण त्यांच्या मागणीला कोणताच प्रतिसाद मिळाला नाही. त्यामुळे संतप्त झालेल्या डंपरमालकांनी जिल्हाधिकारी कार्यालयात जाऊन आंदोलन तीव्र केले, अशी प्रतिक्रिया देत आमदार नितेश राणे यांनी हिंसक आंदोलनाचे अप्रत्यक्षपणे समर्थन केले. दरम्यान, आंदोलकांनी जिल्हाधिकारी कार्यालयात तोडफोड केली. त्यामुळेच पोलिसांना लाठिमार करावा लागला, असे जिल्हा पोलीस अधीक्षक शिंदे यांनी सांगितलं.