कोकणात पूरस्थिती

म. टा. वृत्तसेवा, रत्नागिरी

कोकणात धुवांधार पाऊस कोसळत असून, सोबत वादळी वारे आणि खवळलेल्या समुद्राने कहर केला आहे. रत्नागिरी तसेच सिंधुदुर्गातील सर्व नद्या, नाले, ओढे दुथडी भरून वाहू लागले आहेत. अनेक ठिकाणच्या पुलांवरून वेगाने पाणी वाहात असल्याने अनेक गावांतील वाहतूक खोळंबली आहे. चिपळुणात एक रिक्षा नाल्यात पडून अवघ्या तीन महिन्यांच्या मुलीचा मृत्यू झाला, तर दापोली समुद्रात बोट बुडून तीन मच्छिमार बेपत्ता आहेत.

दापोलीत आंजर्ले व हर्णे समुद्रात पाच मच्छिमार बोटी बुडाल्या. या बोटींतील २९ पैकी २६ मच्छिमार खलाशांना सुखरूप बाहेर काढण्यात आले असून, ३ मच्छिमार बेपत्ता आहेत. रात्री उशिरापर्यंत त्यांचा शोध लागला नव्हता. कैलास जुवाटकर (४०, रा. बाणकोट), शिवचंद राजभर (४०, रा. बुरोंडी, मूळचा मध्य प्रदेश), फुलचंद राजभर (५५, रा. राजगड) अशी या तिघांची नावे आहेत. दापोली, खेड, गुहागर, राजापूर, संगमेश्वर, रत्नागिरी, लांजा आदी ठिकाणी तुफान पावसाने रस्ते, नदी-नाले भरून वाहत असून, भात शेतीला त्याचा फटका बसला आहे. चिपळूणमध्ये एक रिक्षा नाल्यात पडली. त्यातून प्रवास करणा‍ऱ्या दाम्पत्याची तीन महिन्यांची सृष्टी मंगेश सोनवडेकर ही मुलगी पाण्यात बुडून मृत्युमुखी पडली.

सिंधुदुर्गातही पावसाने धुमाकूळ घातला आहे. जिल्ह्यात मंगळवारी १३९ मिमी पाऊस झाला. दोडामार्ग तालुक्यातील भेडशी पुलावर पाणी आल्याने वाहतूक बंद ठेवण्यात आली. मालवणातील मसुरे आणि बागायत या भागातही पुराचे पाणी रस्त्यावर आले. कणकवली, कुडाळ तालुक्यातील नदी-ओढ्यांवरील पुलांवरून पाणी वाहू लागल्याने अनेक ठिकाणची वाहतूक खोळंबली आहे


गुजरातची बोट रत्नागिरीकिनारी

वादळामुळे भरकटलेली गुजरातची मासेमारी बोट रत्नागिरीतील पांढरा समुद्रकिनारी रुतली. बोटीवरील नऊ खलाशांना सुखरूप उतरवण्यात आले आहे.