अखेर कोकण रेल्वे सुरू

मटा ऑनलाइन वृत्त । कणकवली

पावसामुळे कणकवली-ओरोस दरम्यान रेल्वे रूळावर मातीचा ढिगारा आल्याने कोकण रेल्वेची वाहतूक ठप्प झाली होती. दरम्यान, रेल्वेचे अभियंता आणि कर्मचारी घटनास्थळी पोहचले असून ढिगारा हटविण्याचे काम युद्ध पातळीवर सुरू करण्यात आलं होतं. तासाभराच्या प्रयत्नानंतर मातीचा ढिगारा हटविण्यात आला असून कोकण रेल्वे पूर्ववत सुरू झाली आहे.

आज दुपारी ही घटना घडली. कोकणात पावसाला सुरूवात झाल्याने कणकवली-ओरोस दरम्यान मातीचा प्रचंड ढिगारा रेल्वे रूळावर आला. त्यामुळे या मार्गावरील रेल्वे वाहतूक ठप्प ठेवण्यात आली. तसेच खबरदारीचा उपाय म्हणून बिकानेर-कोईम्बतूर एक्सप्रेस कणकवली स्थानकातच थांबवण्यात आली. रेल्वे रूळावर मातीचा ढिगारा आल्याची माहिती मिळताच रेल्वेचे अभियंता आणि कर्मचारी घटनास्थळी दाखल झाले असून मातीचा ढिगारा हटविण्याचे काम सुरू करण्यात आले होते. तासाभराच्या प्रयत्नानंतर मातीचा ढिगारा उपसण्यात प्रशासनाला यश आले.