नीलेश राणे यांना सशर्त जामीन मंजूर

मटा ऑनलाइन वृत्त । रत्नागिरी

काँग्रेसचे चिपळूण तालुकाध्यक्ष संदीप सावंत यांचे अपहरण आणि मारहाण केल्याप्रकरणी न्यायालयीन कोठडीत असलेले काँग्रेसचे माजी खासदार नीलेश राणे यांना खेड सत्र न्यायालयाने आज जामीन मंजूर केला. जामीन देताना त्यांना अनेक अटी घालण्यात आल्या आहेत.

सावंत यांना मारहाण केल्याप्रकरणी चिपळूण न्यायालयाने नीलेश राणे यांचा अटकपूर्व जामीन अर्ज फेटाळून लावला होता. त्यानंतर राणेंनी मुंबई उच्च न्यायालयात धाव घेतली होती. पण उच्च न्यायालयानेही जामीन देण्यास नकार दिला. तसेच २३ मेपर्यंत पोलिसांना शरण या, असे आदेश दिले होते. त्यानुसार शुक्रवारी राणे चिपळूण पोलिसांपुढे शरण आले. त्यांना अटक करून चिपळूण न्यायालयात हजर केले होते. न्यायालयाने त्यांना न्यायालयीन कोठडी सुनावली. ती टाळण्यासाठी त्यांनी जामीन अर्ज केला, मात्र तो फेटाळण्यात आला. कोठडीत असलेल्या राणेंनी खेड सत्र न्यायालयात जामिनासाठी अर्ज केला होता. त्यावर आज सुनावणी झाली. त्यांना न्यायालयाने १५ हजारांच्या जातमुचलक्यावर सशर्त जामीन मंजूर केला आहे.