कोकणवासियांसाठी मोठी बातमी! कशेडी घाटातील बोगद्यातून लवकरच वाहतूक सुरु होणार

म. टा. वृत्तसेवा, चिपळूण : मुंबई-गोवा हायवेवर कशेडी घाटातील बोगद्यातून एकेरी वाहतूक येत्या पावसाळ्यापूर्वी सुरू होणार असल्याची माहिती सार्वजनिक बांधकाम मंत्री रवींद्र चव्हाण यांनी दिली आहे. ऑक्टोबर २०२३पर्यंत या बोगद्याचे काम पूर्ण करण्याचे उद्दिष्ट ठेवण्यात आले आहे. त्यामुळे गणेशोत्सवासाठी मुंबईतून कोकणात जाणाऱ्या चाकरमान्यांसाठी ही बातमी महत्त्वाची ठरणार आहे.

राज्यातील ग्रामीण रस्ते, राष्ट्रीय महामार्ग यांच्या कामांचा आढावा चव्हाण यांनी घेतला. त्यानंतर त्यांनी माध्यमांशी संवाद साधला. महाराष्ट्रात ३ लाख किमी रस्ते जलतगतीने पूर्ण होताना दिसत आहे. त्यात येणाऱ्या अडचणींचा आढावा घेतला आहे. मुंबई-गोवा हायवेच्या कामामध्ये येणाऱ्या अडचणींचाही आढावा घेतला असून हे रस्ते तीन टप्यात पूर्ण होणार आहेत, असे ते म्हणाले. पावसाळ्यापूर्वी यातील अनेक रस्त्यांच्या एकमार्गिका पूर्ण होतील. परशुराम घाटात माती कोसळल्यामुळे ती काढून काम पूर्ण होईल, असे त्यांनी सांगितले.

या बोगद्यामुळे मुंबई-गोवा राष्ट्रीय महामार्गावरून प्रवास करताना अवघड वळणांचा असलेला कशेडी घाटात जाणारा मोठा वेळ वाचणार आहे. ऑक्टोबर २०२३ अखेरपर्यंत या बोगद्याचे काम पूर्ण करण्याचे उद्दिष्ट ठेवण्यात आल आहे. या पावसाळ्याच्या सुरुवातीलाच जूनमध्ये या बोगद्यातून एक मार्गिका वाहतुकीसाठी खुली केली जाणार आहे. बोगद्याचे काम जवळपास आता अंतिम टप्प्यात आले आहे.