समाजवादी नेते प्रा. गोपाळ दुखंडे यांचं निधन

मटा ऑनलाइन वृत्त । सावंतवाडी

ज्येष्ठ समाजवादी नेते प्रा. गोपाळ दुखंडे यांचं आज सावंतवाडी इथं निधन झालं. ते ७४ वर्षांचे होते. दुखंडे यांच्या निधनामुळं महाराष्ट्राच्या परिवर्तनवादी चळवळीतील एक झंझावात शांत झाल्याची भावना व्यक्त होत आहे.

समाजवादी वर्तुळात 'सर' म्हणून परिचित असलेल्या दुखंडे यांच्यावर डॉ. राममनोहर लोहिया यांच्या विचारांचा पगडा होता. त्या विचारसरणीशी प्रामाणिक राहून दुखंडे यांनी कोकणासह महाराष्ट्रात वंचितांच्या हक्कांसाठी अनेक लढे दिले. नाईट स्कूलच्या विद्यार्थ्यांचा मोर्चा असो, विना अनुदानित शिक्षकांचा लढा असो, कोकणातल्या बेरोजगार तरुणांची जनाधिकार परिषद असो, कोकणातला राजकीय दहशतवाद मोडून काढण्यासाठी १९९५ साली मालवण विधानसभा मतदार संघात दिलेली लढाई असो. अतिशय नीडरपणे त्यांनी लोकलढ्यांचे नेतृत्व केले.

कोकणातील तरुणांना रोजगार मिळावा यासाठी ते अखेरपर्यंत प्रयत्नशील होते. त्यासाठी त्यांनी मुंबई विद्यापीठात ग्रामीण विकासाचा अभ्यासक्रम सुरू करण्यात पुढाकार घेतला. सामाजिक कार्यातील त्यांच्या योगदानासाठी त्यांना अनेक पुरस्कारांनी सन्मानित करण्यात आलं होतं.

आमच्या कुटुंबावर आघात : हुसेन दलवाई

'दुखंडे सरांची समाजवादी विचारांवरची निष्ठा कधीही ढळली नाही. अन्याय, अत्याचाराच्या विरोधात त्यांची प्रतिक्रिया नेहमीच अतिशय तीव्र असायची. गेल्या ५० वर्षांपासून त्यांची व माझी मैत्री होती. त्यांचं जाणं हे समाजवादी चळवळीसाठी नुकसान आहेच; पण आमच्या कुटुंबावरही हा आघात आहे,' अशी भावना खासदार हुसेन दलवाई यांनी व्यक्त केली.