जगबुडी, वशिष्ठीनं धोक्याची पातळी ओलांडली!

खेड: दोन दिवसांच्या विश्रांतीनंतर खेड तालुक्यात पुन्हा पावसाने धुडगूस घालायला सुरवात केली असल्याने जगबुडी नदी धोक्याची पातळी ओलांडून वाहू लागली आहे. खबरदारीचा उपाय म्हणून रात्री ८ वाजता मुंबई-गोवा महामार्गावरचा जगबुडी पूल वाहतुकीसाठी बंद करण्यात आला. त्यामुळे महामार्गावर वाहनांच्या रांगा लागल्या होत्या. जगबुडीसह नारिंगी नद्यांच्या पाण्याची पातळीही वाढल्याने नदीकाठच्या ग्रामस्थांसह शहरातील व्यापाऱ्यांना सतर्क राहण्याच्या सूचना करण्यात आल्या आहेत.

गेल्या आठवड्यात संपूर्ण रत्नागिरी जिल्ह्यात धुवांधार पर्जन्य वृष्टी झाल्याने संपूर्ण जिल्यातील जनजीवन विस्कळीत झाले होते. खेडची जगबुडी व चिपळूणची वाशिष्ठी या दोन्ही नद्यांच्या पाण्याची पातळी वाढल्याने हे दोन्ही पूल वाहतुकीसाठी बंद करण्यात आले. त्यामुळे मुंबई गोवा महामार्ग वाहतुकीसाठी बंद झाला होता.

दोन दिवसांच्या विश्रांती नंतर आज सकाळपासून खेड तालुक्यात पावसाने जोरदार हजेरी लावल्याने तालुक्यातील नद्यांच्या पाण्याची पातळी वाढू लागली. जगबुडी नदीचा उगम असलेल्या सह्याद्रीच्या खोऱ्यात जोरदार पाऊस झाल्याने सायंकाळच्या वेळेला जगबुडी नदीच्या पातळीने धोक्याची पातळी ओलांडली. जगबुडीचे पाणी जुन्या पुलाला पोहचण्याची परिस्थिती निर्माण झाल्याची माहिती मदत ग्रुपचे प्रसाद गांधी यांनी खेडचे तहसीलदार शिवाजी जाधव यांना देताच जाधव यांनी तात्काळ जगबुडी पुलावर धाव घेतली. दरम्यान खेड पोलिसही घटनास्थळी दाखल झाले. पोलिसांनी मदत ग्रुपचे सदस्यांच्या मदतीने रात्री ८ वाजता जगबुडी पूल वाहतुकीसाठी बंद केला. पूल बंद झाल्याने रस्त्याच्या दोन्ही बाजूला वाहनांच्या मोठमोठ्या रांगा लागलेल्या होत्या. जगबुडी पुलावर कोणताही अनुचित प्रकार घडू नये यासाठी पुलाच्या दोन्ही बाजूला पोलीस बंदोबस्त ठेवण्यात आला आहे.