खेळता-खेळता ४ वर्षांची चिमुकली थेट पाचव्या मजल्यावरून कोसळली; उपचारादरम्यान सोडले प्राण

सांगली : पाचव्या मजल्यावरून पडून एका चार वर्षीय बालिकेचा मृत्यू झाल्याची धक्कादायक घटना सांगली जिल्ह्यातील मिरज शहरात घडली आहे. यष्वी दीनेश देशमाने (वय ४ वर्षे) असं या मृत चिमुकलीचं नाव आहे. मुलीच्या दुर्दैवी मृत्यूने परिसरात हळहळ व्यक्त करण्यात येत आहे. मिरज शहरातील बुधगावकर मळा येथे ही घटना घडली आहे.

मिळालेल्या माहितीनुसार, यष्वी देशमाने हिचे वडील हे डॉक्टर असून ते निर्मिती टॉवर इमारतीमधील पाचव्या मजल्यावर राहतात. मंगळवारी यष्वी ही आपल्या घराच्या गॅलरीत खेळत होती. मात्र खेळता-खेळता यष्वीचा गॅलरीतून तोल जाऊन ती थेट पाचव्या मजल्यावरून खाली पडली. गंभीर अवस्थेतील यष्वीला रुग्णालयात दाखल करण्यात आले होते. मात्र उपचार सुरू असताना यष्वीचा मृत्यू झाला आहे.

चाकरमान्यांसाठी मोठी बातमी; आता ठाण्यातून सीएसएमटी थेट मेट्रोप्रवास, पूर्ण प्लान समजून घ्या

या घटनेने परिसरात हळहळ व्यक्त होत असून या घटनेची नोंद महात्मा गांधी पोलीस ठाणे येथे झाली आहे. याप्रकरणी अधिक तपास महात्मा गांधी पोलीस अधिक तपास करत आहेत.

दरम्यान, खेळण्याच्या नादात लहान मुलांसोबत दुर्घटना घडण्याचा धोका असतो. त्यामुळे पालकांनीही मुलांकडे अधिक काटोकोरपणे लक्ष देण्याची गरज असते. मिरज शहरात नुकत्याच घडलेल्या या घटनेनंही बालकांकडे लक्ष देणं किती गरजेचं असतं, हे पुन्हा एकदा अधोरेखित झालं आहे.