सांगली शिवसेना जिल्हा प्रमुखाचे शिंदेंना समर्थन, जयंत पाटलांवर केले गंभीर आरोप

सांगली : सांगली जिल्ह्यातील शिवसेनेतही फूट पडली आहे. ग्रामीण जिल्हा प्रमुख आनंद पवारांनी आपण व जिल्ह्यातील शिवसेना कार्यकर्ते एकनाथ शिंदेंसोबत असल्याचं जाहीर केलं. राष्ट्रवादी काँग्रेस प्रदेशाध्यक्ष आणि जलसंपदा मंत्री जयंत पाटील यांच्यावर गंभीर आरोप करत आपला बंड राष्ट्रवादी काँग्रेस विरोधात असल्याचे स्पष्ट केले आहे.

एकनाथ शिंदे यांच्या बंडात राज्यातल्या आमदार, खासदार आणि नगरसेवकांच्या बरोबर आता जिल्हाप्रमुख देखील सहभागी होण्याचा निर्णय घेत असल्याचे पाहायला मिळत आहे. सांगलीचे ग्रामीण जिल्हाप्रमुख आनंद पवार यांनी देखील एकनाथ शिंदे यांच्या बंडाला पाठिंबा दिला आहे. शिंदेंसोबत असल्याचं त्यांनी पत्रकार परिषद घेऊन जाहीर केले. एकनाथ शिंदे यांच्यासोबत सांगली जिल्ह्यातला शिवसेना कार्यकर्ता ठाम उभा असल्याचा आनंद पवार यांनी स्पष्ट केलं आहे.

हा सर्व बंड आणि आपला बंड राष्ट्रवादी कॉंग्रेसच्या विरोधात आहे. विशेष करून सांगली जिल्ह्याचे पालकमंत्री आणि राष्ट्रवादी काँग्रेसचे प्रदेशाध्यक्ष व जलसंपदा मंत्री जयंत पाटील यांच्या विरोधातही असल्याचं आनंद पवार यांनी स्पष्ट केलं आहे. तसेच राष्ट्रवादी काँग्रेसचे प्रदेशाध्यक्ष जयंत पाटील यांच्यावर यावेळी पवार यांनी गंभीर आरोप देखील केले.

इस्लामपूरमध्ये पालकमंत्री जयंत पाटील हे नेहमीच दुजाभाव करत राहिले आहेत. ते शिवसेनेची गळचेपी करत आहेत. वारंवार आम्ही पक्षाला सांगितले. पण त्याला कोणताही प्रतिसाद मिळाला नाही. या उलट शिवसेनेच्या अनेक नेत्यांना खुनाच्या गुन्ह्यांमध्ये गोवले गेले. निधी देखील शिवसेनेला दिला जात नाही, यासह अनेक आरोप आनंद पवार यांनी केले आहेत. आम्ही शिवसेना सोडणार नाही. मात्र जिल्ह्यातील अनेक पदाधिकारी आम्ही एकनाथ शिंदे यांच्यासोबत असून आमचा बंड राष्ट्रवादी काँग्रेसच्या अन्याया विरोधात असल्याचे ग्रामीण जिल्हाप्रमुख आंनद पवार यांनी स्पष्ट केलं आहे.