सांगलीत एसटीचे पुन्हा आंदोलन, सदाभाऊ खोत यांच्या नेतृत्वाखाली आज लाक्षणिक उपोषण

सांगली : एसटी कर्मचाऱ्यांना राज्य शासनामध्ये विलीन करून घ्यावे, या मागणीवर अजूनही एसटी कामगार अडून आहेत. या मागणीकडे लक्ष वेधण्यासाठी आज रयत क्रांती संघटनेचे अध्यक्ष आमदार सदाभाऊ खोत यांच्या नेतृत्वाखाली इस्लामपूर आणि शिराळा आगारात आंदोलन सुरू करण्यात आले. या दोन्ही आगारातील बस सेवा बंद केली असून, एसटी कर्मचाऱ्यांनी लाक्षणिक उपोषण सुरू केले आहे. या आंदोलनामुळे ऐन दिवाळीत इस्लामपूर आणि शिराळा परिसरातील एसटीची वाहतूक ठप्प झाली आहे.

अनिमित वेतनामुळे एसटी कर्मचाऱ्यांकडून आत्महत्याचे सत्र सुरू आहे. गेल्या वर्षभरात ३७ एसटी कर्मचा-यांनी नैराश्यातून आत्महत्या केल्या आहेत. आत्महत्या केलेल्या कर्मचाऱ्यांना श्रद्धांजली अर्पण करून आज इस्लामपूर आणि शिराळा एसटी आगारात आमदार सदाभाऊ खोत यांच्या नेतृत्वाखाली एसटी कर्मचा-यांनी उपोषणास सुरवात केली.

यावेळी बोलताना आमदार खोत म्हणाले की, संवेदना हरवल्या सारखे महाविकास आघाडी सरकार या एसटी कर्मचाऱ्यांच्या विषयाकडे बघत आहे. परंतु राज्य सरकारने दुर्लक्ष केले असले तरी, आम्ही एसटी कर्मचाऱ्यांच्या पाठीशी उभे आहोत. या पुरोगामी महाराष्ट्रामध्ये ३७ एसटी कर्मचाऱ्यांनी आत्महत्या केल्या आहेत, तरी हे राज्य सरकार त्यांच्याकडे बघायला तयार नाही हे खूप दुर्दैवी आहे. वाळवा तालुका हा क्रांतिकारकांचा तालुका आहे. या मातीतील आपण माणसं कसे काय गप्प बसू शकतो? जर महाविकास आघाडी सरकारने तात्काळ एसटी कर्मचाऱ्यांचा प्रश्न संपवले नाहीत तर, आंदोलन तीव्र करण्यात येईल, असा इशाराही आमदार सदाभाऊ खोत यांनी दिला.