अलका कुबल-प्राजक्ता गायकवाड वाद उदयनराजेंच्या दरबारात

सातारा: 'आई माझी काळूबाई' ही टीव्ही मालिका तडकाफडकी सोडणारी अभिनेत्री प्राजक्ता गायकवाड व मालिकेच्या निर्मात्या, ज्येष्ठ अभिनेत्री अलका कुबल यांच्यातील वाद खासदार उदयनराजे भोसले यांच्या दरबारात गेला आहे. अलका कुबल यांनी स्वत: साताऱ्यात उदयनराजे यांची भेट घेऊन या संदर्भात चर्चा केली.

एका सहकलाकाराने आई-बहिणीवरून शिवीगाळ केल्याचा आरोप प्राजक्ता गायकवाड हिनं केला होता. तिनं मालिकेच्या निर्मात्या अलका कुबल यांच्याकडं तक्रारही केली होती. मात्र, त्यांनी याकडं दुर्लक्ष केलं. त्यामुळं मी मालिका सोडल्याचं प्राजक्ता हिनं सांगितलं होतं. अलका कुबल यांनी तिचे आरोप फेटाळताना तिच्याबद्दल अनेक तक्रारी केल्या होत्या. 'प्राजक्ता वेगवेगळ्या कार्यक्रमांना जाण्यासाठी सतत सुट्टी मागायची. सेटवर उशिरा यायची. तिच्या उशिरा येण्यामुळं अनेकदा चित्रीकरणाला उशीर झाला होता,' असं अलका कुबल यांनी स्पष्ट केलं होतं. मात्र, प्राजक्तानं हे सर्व आरोप फेटाळले होते. 'चार महिने मी केलेल्या कामाचे पैसे अद्याप मिळाले नसल्याचं तिनं म्हटलं होतं. हा वाद पेटल्यानंतर काही संघटनांनी अलका कुबल यांनी माफी मागावी, अशी मागणी केली होती. 'स्वराज्य रक्षक संभाजी' मालिकेचा उल्लेख एकेरी केल्यानंही त्यांच्यावर टीका होत होती.

वाचा: चार महिने शूटिंग केलं पण एक रुपयाही दिला नाहीए; प्राजक्ता गायकवाडचा आरोप

या सगळ्या पार्श्वभूमीवर अलका कुबल यांनी रविवारी उदयनराजे यांची भेट घेतली. उदयनराजेंनी स्वत: ट्वीट करून ही माहिती दिली आहे. 'जेष्ठ अभिनेत्री अलका कुबल यांनी आज भेट घेतली. काही दिवसांपासून अभिनेत्री प्राजक्ता गायकवाड यांच्यासोबत काही विषयांवर झालेल्या वादाबद्दल चर्चा झाली. यावेळी अभिनेत्री प्राजक्ता गायकवाड यांच्याशी देखील चर्चा केली. हा वाद लवकरच मिटवून पुन्हा एकत्र येऊन काम करावे ही इच्छा आम्ही व्यक्त केली,' असं त्यांनी म्हटलं आहे.
वाचा: 'दिवाळी पहाटेच्या कार्यक्रमांचे राज्य सरकारला वावडे का?'