सयाजीनं लावलेल्या झाडांची कत्तल करणारा जेरबंद

मटा ऑनलाइन वृत्त । सातारा

दुष्काळावर मात करण्यासाठी अभिनेता सयाजी शिंदे यांनी लावलेल्या झाडांची बेदरकारपणे कत्तल करणाऱ्या आप्पा मदने या इसमाला अखेर अटक करण्यात आली आहे. पोलिसांच्या जाळ्यात सापडलेला आप्पा मदने पांढरवाडीतलाच रहिवाशी आहे.

माण तालुक्यातील पांढरवाडी येथे सयाजी शिंदे यांनी २५ हजाराहून अधिक झाडे लावली होती. सयाजीनं नवीन वर्षाचं स्वागतच या झाडांना पाणी घालून केलं होतं. सहा महिन्यापासून या झाडांना नियमित पाणी घालून जगवलं जात होतं. ही झाडं वाचविण्यासाठी विद्यार्थ्यांसह अख्ख गाव मेहनत करत होतं. पण आप्पा मदने यांनी अचानक या झाडांवर कुऱ्हाड चालविली. त्यानं सुमारे १०० झाडे तोडल्याचं सांगितल्या जातं.

सयाजी शिंदे यांनी लावलेली झाडं आपल्या हद्दीत असल्याचा दावा करतानाच ही झाडे लावताना मला कोणतीही विचारणा करण्यात आली नव्हती, असं आप्पानं म्हटलं आहे. दरम्यान पांढरवाडीतील झाडे तोडणाऱ्याला अटक करण्याच्या मागणीसाठी सयाजी शिंदे आणि मित्र परिवारानं आज मुंबईतील आझाद मैदानात धरणे आंदोलनेही केली होती.