म. टा. वृत्तसेवा, कराड
करमाळा तालुक्यातील जेऊर येथील सराफ व्यावसायीक रावसाहेब जाधव यांच्या कोठडीतील मृत्यू प्रकरणी सीआडीच्या पथकाने जेऊर, करमाळा आणि कराड परिसरात चौकशी केली. दरम्यान, खून प्रकरणी शहर पोलिस ठाण्याचे दोन अधिकारी व दहा कर्मचाऱ्यांवर खुनाचा गुन्हा दाखल झालेले पोलिस अधिकारी व कर्मचारी फरार असून, त्यांचा शोध सीआयडीच्या तपास पथकाकडून सुरू आहे. शिवाय संशयितांच्या अटकपूर्व जामिनासाठी हालचाल सुरू असून, त्यांचे अर्ज लवकरच कोर्टात दाखल होण्याची शक्यता व्यक्त होत आहे.
साताऱ्याचे पोलिस अधीक्षक संदीप पाटील यांनी या घटनेचा संपूर्ण तपास सीआयडीकडे सोपविला होता. सीआयडीकडे तपास वर्ग होताच, या घटनेतील प्रत्यक्षदर्शी साक्षीदार व फिर्यादी अनिल डिकोळे यांनी सीआडीकडे दिलेल्या फिर्यादीत कराड शहरच्या संबंधित पोलिस अधिकारी व कर्मचाऱ्यांनी २५ लाख रुपयांची खंडणी मागितल्याचा आरोप केला होता. रावसाहेब जाधव यांच्या मृतदेहाचे शवविच्छेदन मिरज मेडीकल कॉलेजच्या हॉस्पिटलमध्ये तज्ज्ञांच्या समितीने केले होते. त्यामध्ये जाधव यांचा मृत्यू मारहाणीमुळे झाल्याचे स्पष्ट झाल्याने फिर्यादींच्या या आरोपामुळे पोलिस दलासह सर्वत्रच खळबळ उडाली होती.
सीआयडीच्या एका पथकाने निंबारे (ता. करमाळा, जि. सोलापूर) येथे मयत रावसाहेब जाधव यांची पत्नी, नातेवाईक,फिर्यादी अनिल डिकोळे व अन्य काही जणांचे जबाब घेतले आहेत. तसेच जेऊर येथे मृत जाधव यांची विजयालक्ष्मी सराफ पेढी होती. या पेढीचे ते मालक होते. त्यामुळे तेथेही हे पथक अधिक चौकशी करीत आहे. याचबरोबर सीआयडीच्या अन्य एका पथकाने निलंबित व. पो. नि. विकास धस व स. पो. नि. हणमंत काकंडकी यांच्या आतापर्यंतच्या पोलिस दलातील सेवा कालावधीतील कारकिर्दीची माहिती घेतली आहे. त्यांच्याबाबत काही जणांकडे चौकशी सुरू केली आहे.