म. टा.वृत्तसेवा, कराड
कराड तालुक्यातील येणपे येथे बलात्कार करून खून झालेल्या सविता गणेश पाटील या महिलेच्या रक्षाविसर्जनासाठी जमलेल्या ग्रामस्थांनी विशेष ग्रामसभा आयोजित करून दोषींना कायदेशीर मार्गाने कठोर शिक्षा व्हावी, असा ठराव केला. दरम्यान, संतप्त झालेल्या जमावाने आरोपींच्या घरावर दगडफेक करत तोडफोड केली. या वेळी दोघांना लोखंडी गजाने मारहाण झाली आहे. तसेच, काही वाहनांची तोडफोड करण्यात आली. पोलिसांनी त्यांना अडवण्याचा प्रयत्न केल्यानंतर तणाव निवळला.
सविता पाटील या जनावरे चारण्यासाठी वाघजाईच्या समोरील खडी नावाच्या शिवारात गेल्या असता, त्यांचा बलात्कार करून खून करण्यात आला होता. त्या अनुषंगाने पोलिस यंत्रणेने तपास करत १२ तासांत करण शंकर कोळी यासह एका अल्पवयीन मुलास अटक केली. गुरुवारी सविता यांचा रक्षा विसर्जनाचा कार्यक्रम असल्याने गावातील महिला, तरुण, तरुणी, ग्रामस्थ मोठ्या प्रमाणात जमल्याने काहीकाळ तणाव निर्माण झाला होता. महिला व ग्रामस्थातून विशेष ग्रामसभा बोलावून संबंधित आरोपीना कठोर शिक्षा देण्याबरोबर येणपे गावातील गावरान जमिनीवरील अतिक्रमण काढण्याबाबत एकमुखी ठराव घेण्यात आला. या वेळी जिल्हा पोलिस प्रमुख पंकज देशमुख, अप्पर पोलिस अधीक्षक विजय पवार, उपअधिक्षक नवनाथ ढवळे, अशोक क्षीरसागर, जिल्हा परिषद सदस्य अॅड. उदयसिंह पाटील, बळीराजा शेतकरी संघटनेचे पंजाबराव पाटील, प्रांताधिकारी हिम्मत खराडे, पै. तानाजी चवरे, सुभाष शेवाळे, येणपेचे सरपंच दादासाहेब जगताप यांनी जमावाला शांत करत शांततेचे आवाहन केले. त्याचबरोबर जिल्हा पोलिस प्रमुख पंकज देशमुख यांनी संबंधित आरोपीला कठोर शिक्षा होण्याचे आश्वासन दिल्यानंतर वातावरण रक्षाविसर्जन कार्यक्रम पार पडला.