सातारा
तिळगंगा नदीकाठी वसलेल्या कोरेगाव शहरातील तुंबलेली गटारे, वाढती अस्वच्छता व नगरपंचायतींच्या आरोग्य विभागाचा हलगर्जीपणा, अशा विविध कारणांमुळे डेंगीच्या आजाराने थैमान घातले आहे. १५ दिवसांत ७०पेक्षा अधिक डेंगीच्या पेशंटवर सरकारी व खासगी हॉस्पिटलमध्ये उपचार सुरू आहेत. गंभीर पेशंटना पुण्यातील खासगी हॉस्पिटलमध्ये दाखल केले आहे.
कोरेगाव शहरातील तिळगंगा नदीच्या दोन्ही बाजूला दाट लोकवस्तीची ठिकाण आहेत. येथील जुनी पेठ, बौद्धवस्ती, मातंगवस्ती, गोसावी वस्ती, वेताळगल्ली यासह जुन्या गावठाण हद्दीतील ७०पेक्षा अधिक नागरिकांना डेंगीची लागण झाल्याची माहिती कोरेगाव ग्रामीण हॉस्पिटल, विविध खासगी हॉस्पिटल व प्राथमिक आरोग्य विभागाकडून मिळाली.
डेंगीच्या आजाराने निम्या कोरेगाव शहराला विळखा घातला असून, कोरेगाव येथील खासगी हॉस्पिटलमध्ये घेत असणाऱ्या व्यापारी रमेश जेबले यांची प्रकृती ढासळल्याने त्यांना पुणे येथे रुबी हॉस्पिटलमध्ये हलवले. कोरेगाव शहरात डेंगीच्या साथीने घबराटीचे वातावरण निर्माण झाल्याचे चित्र दिसून येत आहे.