धक्कादायक! बापाकडूनच दोन मुलांची हत्या

सातारा:आजारावरून पत्नी दररोज भांडण उकरून काढते आणि सतत माहेरी जाते म्हणून कंटाळलेल्या पतीने आपल्या दोन मुलांची हत्या केल्याची धक्कादायक घटना उघडकीस आली आहे. गौरवी चंद्रकांत मोहिते (११) व प्रतिक चंद्रकांत मोहिते (७) अशी हत्या करण्यात आलेल्या मुलांची नावे असून याप्रकरणी पोलिसांनी चंद्रकांत मोहिते (३८) याला अटक केली आहे. मोहिते कुटुंबीय घाटकोपरचे रहिवासी असून मुलांना ठार केल्यानंतर चंद्रकांत याचा आत्महत्या करण्याचा विचार होता.

घाटकोपर पश्चिमेला जागृती नगर येथे चंद्रकांत हा पत्नी आणि दोन मुलांसह वास्तव्यास होता. ओला टॅक्सी चालवून तो कुटुंबाचा उदरनिर्वाह करीत होता. त्याला काही दिवसांपूर्वी क्षयरोगाची बाधा झाली. याच कारणावरून त्याची पत्नी दररोज घरामध्ये भांडण करीत होती. मंगळवारी चंद्रकांत याने त्याच्या भावाला फोन केला आणि आत्महत्या करीत असल्याचे सांगितले. चंद्रकांतच्या फोनमुळे घाबरलेल्या भावाने घाटकोपर पोलिस ठाणे गाठले आणि याबाबतची माहिती दिली. चंद्रकांत ओला टॅक्सी चालवीत असल्याने त्यामध्ये जीपीआरएस प्रणाली होती. त्याआधारे घाटकोपर पोलिसांनी त्याचा शोध सुरू केला असता तो पुणे-सातारा महामार्गावर असल्याचे निदर्शनास आले. घाटकोपर पोलिसांनी याबाबतची माहिती राजगडचे सहाय्यक पोलिस निरीक्षक दत्तात्रय दराडे यांना दिली. त्यांच्या पथकाने शोध घेत खेडशिवापूर टोल नाक्यावर ही गाडी अडवली. चंद्रकांत यांना ताब्यात घेऊन दोन मुलांबाबत विचारले असता त्याने ठार करून डिक्कीमध्ये ठेवल्याचे सांगितले. शिरवळ पोलिसांनी दोन्ही मृतदेह ताब्यात घेऊन चंद्रकांत याला अटक केली. पत्नीच्या रोजच्या टोमण्यांचा कंटाळा आला होता. आत्महत्या केल्यानंतर मुलांचा सांभाळ कोण करणार? हा प्रश्न असल्याने दोघांना मारल्याचे त्याने चौकशीत सांगितले.

पत्नीला मृतदेह दाखविण्यासाठी पुन्हा निघाला

प्रवासादरम्यान मुलगा झोपला मात्र मुलगी जागी होती. ती झोपेपर्यंत चंद्रकांत याने वाट पाहिली. शिंदेवाडीजवळ मुलगी झोपल्याचे पाहून दोघांना मारायच्या इराद्याने त्याने गाडी रस्त्याच्या कडेला थांबवली. तेवढ्यात गौरवी जागी झाली. कशासाठी गाडी थांबवली असे तिने विचारताच काहीही विचार न करता चंद्रकांत याने तिचा गळा दाबला. त्यानंतर झोपेत असलेल्या प्रतीकचा गळा दाबला. दोघांचे मृतदेह तसेच डिक्कीमध्ये टाकले. पत्नीला मुलांचे मृतदेह दाखवण्यासाठी तो तिथूनच घाटकोपरच्या दिशेने परत निघाला. त्याचवेळी जीपीएस लोकेशननुसार पोलिसांनी कार अडवली आणि सर्व प्रकार उघडकीस आला.