आमदार दिलीप मोहिते-पाटील यांना 'हनी ट्रॅप' जाळ्यात अडकवण्याचा प्रयत्न ?

सातारा : खेड-आळंदी विधानसभा मतदारसंघाचे राष्ट्रवादी काँग्रेसचे आमदार दिलीप मोहिते-पाटील यांना बदनाम करण्यासाठी 'हनी ट्रॅप'चा प्रयोग करणाऱ्या तिघांविरोधात सातारा तालुका पोलिस ठाण्यात गुन्हा दाखल करण्यात आला आहे.

शैलेश शिवाजी मोहिते-पाटील (रा. सांगवी), राहुल किसन कांडगे (रा. चाकण), सोमनाथ दिलीप शेडगे (रा. सातारा) अशी गुन्हा दाखल झालेल्यांची नावे आहेत. हा प्रकार एका युवतीमुळे उघडकीस आला असून, या प्रकरणी आमदार दिलीपराव मोहिते-पाटील यांचे पुतणे मयूर साहेबराव मोहिते-पाटील यांनी सातारा तालुका पोलिस ठाण्यात फिर्याद दिली.

'संशयितांनी साताऱ्यातील एका युवतीच्या माध्यमातून आमदार दिलीप मोहिते-पाटील यांना 'हनी ट्रॅप'मध्ये अडकवून, त्यांच्याकडून लाखो रुपये उकळण्याचा डाव आखला होता. संबंधित युवतीला काही रक्कम संशयितांनी दिली होती. मात्र, त्या युवतीनेच संशयितांचा भांडाफोड करून हा प्रकार उजेडात आणला. साताऱ्यातील या युवतीने फोन करून याबाबत माहिती दिली,' असे तक्रारीत म्हटले आहे. या प्रकरणी अद्याप कोणाला अटक झालेली नसून, पुढील तपास पोलीस निरीक्षक सजन हंकारे करीत आहेत.