म. टा. वृत्तसेवा, कराड
पश्चिम सुपने (ता. कराड) येथील जवानाचा नवी दिल्ली येथे अपघाती मृत्यू झाल्याची घटना सोमवारी घडली होती. विनोद अशोक गायकवाड, असे मृत जवानाचे नाव आहे. दरम्यान, मंगळवारी दुपारी गावी त्यांच्यावर सरकारी इतमामात अंत्यसंस्कार करण्यात आले. त्यांच्या पश्चात पत्नी, आई, वडील, पत्नी, भाऊ असा परिवार आहे.
पार्थिव मंगळवारी दुपारी गावी आणल्यानंतर त्यांच्या कुटुंबीयांनी केलेला आक्रोश हृदय पिळवटून टाकणारा होता. त्यानंतर सजवलेल्या वाहनातून अंत्ययात्रा काढण्यात आली. लष्करी जवान आणि पोलिस दलाच्या वतीने बंदुकीच्या तीन फैरी झाडून मानवंदना देण्यात आली. तसेच ग्रामस्थांसह परिसरातील हजारो नागरिकांनी उपस्थिती लावत आपल्या लाडक्या जवानाला अखेरचा निरोप दिला. या घटनेमुळे सुपने गावावर शोककळा पसरली आहे.
पश्चिम सुपने येथील विनोद गायकवाड केंद्रीय औद्योगिक सुरक्षा दलात सेवेमध्ये होते. सध्या त्यांची नवी दिल्ली येथे एनएसजीच्या विशेष कमांडो पथकात नेमणूक होती. रविवारी एक जानेवारीला सकाळी विनोद गायकवाड यांचा दिल्लीजवळील गुरगावच्या मानेसर परिसरात दुचाकीवरून जात असताना अपघात झाला होता. त्यामध्ये ते गंभीर जखमी झाले होते. अपघातानंतर तत्काळ त्यांना उपचारार्थ तेथील एका रुग्णालयात दाखल करण्यात आले होत. मात्र, उपचारादरम्यानच सोमवारी त्यांचा मृत्यू झाला.
सुमारे पंधरा दिवसांपूर्वी विनोद यांचा धाकटा भाऊ विशाल याचा विवाह समारंभ होता. या विवाहासाठी विनोद गावी आले होते. समारंभ आटोपल्यानंतर आठच दिवसांपूर्वी ते पुन्हा सेवेत रुजू झाले. रविवारी अचानक त्यांचा अपघात झाला असून, रुग्णालयात दाखल करण्यात आले असल्याची माहिती त्यांच्या कुटुंबीयांना कळविण्यात आली होती.