सातारा
आंतरराष्ट्रीय धावपट्टू, माणदेश एक्सप्रेस ललिता बाबरचा आज, गुरुवारी सातारकरांच्या वतीने भव्य मिरवणूक काढून नागरी सत्कार करण्यात येणार आहे. रॅलीत जिल्ह्यातील विविध शाळा व महाविद्यालयांचे पाच हजारांहून अधिक विद्यार्थी सहभागी होणार आहेत. हा सोहळा अत्यंत नेटका व भव्यदिव्य साजरा करण्याचा निर्धार सातारकरांनी केला आहे.
ललिताच्या या सत्कार सोहळ्याच्या अनुषंगाने जिल्हा क्रीडा अधिकारी कार्यालय, माध्यमिक शिक्षण विभाग, जिल्ह्यातील सर्व खेळांच्या क्रीडा संघटना, जिल्हा शारीरीक व क्रीडा संघटना, खेळाडू व नागरिकांची मंगळवारी साताऱ्यात बैठक झाली.
ललिता बाबरच्या नागरी सत्कारापूर्वी साताऱ्यातून रॅली काढण्यात येणार आहे. या रॅलीमध्ये शाळा व महाविद्यालयांतील पाच हजारांहून अधिक विद्यार्थी सहभागी होणार आहेत. सर्व क्रीडा संघटना, नागरिक, विविध संस्थांना बरोबर घेऊन भव्य सत्कार सोहळा होणार आहे. सकाळी दहा वाजता राजवाडा येथून मुख्य रॅलीला सुरूवात होणार आहे. या रॅलीचे ठिकठिकाणी उत्साहात व दणक्यात स्वागत केले जाणार आहे. गांधी मैदान, राजवाडा, मोती चौक, देवी चौक, राजपथ, कमानी हौद, शेटे चौक, पोलिस मुख्यालय, पोवईनाका, सातारा बसस्थानकमार्गे शाहू स्टेडियम, असा रॅलीचा मार्ग राहणार आहे. रॅलीमार्गावर कन्याशाळेच्या विद्यार्थिनी दुतर्फा उभे राहून स्वागत करणार आहेत. ठिकाठिकाणी स्वागत कमानी, शुभेच्छा फलक लावण्याचेही नियोजन करण्यात आले. या शिवाय ठिकठिकाणी फुलांच्या पायघड्या, रांगोळ्या टाकल्या जाणार आहेत.