खाशाबांचा सहावीला धडा

सातारा ः संघर्षमय जीवनातून ऑलिंपिकवीर खाशाबा जाधव यांनी केलेल्या यशस्वी वाटचालीतून विद्यार्थ्यांना प्रेरणा मिळावी, यासाठी राज्य शिक्षण मंडळाने इयत्ता सहावीच्या पाठ्यपुस्तकात ओळख थोरांची या उताऱ्यात खाशाबा जाधव यांच्यावरील धड्याचा समावेश केला आहे.

ऑलिंपिकवीर खाशाबा जाधव, या संजय दुधाणे लिखित पुस्तकातून हा उतारा घेण्यात आला आहे. ओळख थोरांची या उताऱ्यात खाशाबा जाधव यांच्या चरित्राची थोडक्यात माहिती विद्यार्थ्यांना उपलब्ध झाली आहे. खाशाबांचे मूळ गाव कोणते, त्यांचे माता-पिता कोण, त्यांना कुस्तीची आवड कशी निर्माण झाली, त्यांना कुस्तीचे बारकावे कोणी शिकविले आदींची माहिती विद्यार्थ्यांना मिळू शकणार आहे. खाशाबा जाधव यांचा शालेय शिक्षणासाठी रोजचा पाच किलोमीटरचा प्रवास, प्रवास-सरावाची सांगड घालण्यासाठी खाशाबा नेमके काय करीत, असे खाशाबांच्या जीवनातील सर्व क्षण या धड्यात नमूद आहेत. खाशाबा जाधव हे भारताचे पहिले ऑलिंपिक कांस्यपदक विजेते खेळाडू होते. या स्पर्धेकरिता त्यांनी अनेक अडचणींचा सामना केला आणि देशासाठी पदक पटकावले. अभ्यासक्रमात खाशाबांवर धडा आल्याने मुलांना प्रेरणा मिळेल.