निरीक्षक विकास धस यांचा अटकपूर्व जामीन नामंजूर

कराड : पोलिसांच्या ताब्यात असताना झालेल्या मृत्यूप्रकरणी निलंबित पोलिस निरीक्षक विकास धस यांचा अटकपूर्व जामीन गुरुवारी अतिरिक्त जिल्हा आणि सत्र न्यायाधीश एस. टी. गड्डम यांनी फेटाळला. दरोड्याप्रकरणी संशयावरून ताब्यात घेण्यात आलेले करमळा येथील सराफ व्यावसायिक रावसाहेब जाधव यांचा पोलिसांच्या ताब्यात असताना संशयास्पदरीत्या मृत्यू झाला होता.
सकृतदर्शनी संशयित या गुन्ह्यात सामील असल्याचे निरीक्षण न्या. गड्डम यांनी नोंदविले. विकास धस यांच्यावतीने प्रख्यात विधिज्ञ अॅड. डी. व्ही. पाटील यांनी युक्तिवाद केला. त्यांचा युक्तिवाद संपल्यानंतर सरकारपक्षातर्फे अँड. आर. सी. शाह यांनी युक्तिवाद केला. तो मंगळवारी पाच जुलै रोजी संपला. यावेळी अॅड. शाह यांनी बचाव पक्षाने सादर केलेले पुरावे हे पश्चात बुद्धीने तयार केले असल्याचा दावा केला. दोन्हीकडील युक्तिवाद ऐकल्यानंतर न्या. गड्डम यांनी जामीन अर्ज फेटाळल्याचे घोषित केले.
या प्रकरणाचा तपास सीआयडीकडून केला जात असून या पथकाने आतापर्यंत मृत जाधव यांच्या नातेवाईकांसह अनेकांचे जबाब नोंदविले आहेत. शवविच्छेदन अहवालही सीआयडीला मिळाला आहे. त्यामध्ये जाधव यांचा मृत्यू मारहाणीमुळे झाल्याचा निष्कर्ष काढण्यात आला असल्याचे समजते.
जेऊर, (ता. करमाळा, जि. सोलापूर) येथील रावसाहेब लक्ष्मण जाधव यांना कराड शहर पोलीसांनी एका बस रॉबरीतील सोने खरेदी केल्याच्या गुन्हयामध्ये जाधव यांचे करमाळा येथून बेकायदा अपहरण करून त्यांना अमानुष मारहाण केली होती. रावसाहेब जाधव यांच्यासह त्यांचा मेव्हुणा अनिल डिकोळे यालाही पोलिसांनी तेथूनच ताब्यात घेतले होते. वाटेत दोघांनाही बेदम मारहाण करण्यात आली. या मारहाणीत जाधव यांचा जागीच मृत्यू झाला तर अनिल डिकोळे हे गंभीर जखमी झाले होते. याबाबत अनिल डिकोळे यांनी दिलेल्या फिर्यादीनुसार सीआयडीने पोलिस निरीक्षक विकास धस, सहायक निरीक्षक हणमंत काकंडकी यांच्यासह दहा पोलिस कर्मचाऱ्यांवर खुनाचा गुन्हा नोंद करण्यात आला होता.