RTOला घाबरून पठ्ठ्याने सुसाट कार थेट गल्लीबोळात घातली, तरी अधिकाऱ्यांना घावला, असा दंड बसला की...

सातारा : आरटीओ पथकाची गाडी पाहताच कारचालकाने पळ काढला. वाहतूक निरीक्षकांना संशय आल्याने त्यांनी कारचा पाठलाग केला. चालकाने शहराच्या गल्लीबोळातून कार पळविण्याचा प्रयत्न केला. या धरपकडीवेळी भरधाव वेगात असलेल्या कारने एका दुचाकीला धडक दिली. या धडकेत कारचा पुढील टायर पंक्चर झाल्याने वेग कमी झाला. अखेर पाठीमागून आलेल्या वाहतूक निरीक्षकांनी चालकाला पकडलं.

सातारा उपप्रादेशिक परिवहन कार्यालयातील अधिकाऱ्यांचं फिरतं पथक महाबळेश्वरमध्ये दाखल झालं आहे. हे पथक दर महिन्याला शहर व तालुक्यात प्रवासी वाहतूक करणाऱ्या वाहनांचा वाहन कर, वाहन परवाना, वाहन नोंदणी, वाहन पासिंग अशी दर महिन्याला कागदपत्रे तपासणी करतं. तालुक्यात काळी पिवळी ट्रॅक्सी व टुरिस्ट टॅक्सी जवळपास ८०० वाहने आहेत. यात कोणाच्या वाहनाचे कागदपत्रे अपुरे तर कोणी परवाना भरलेला नाही. त्यामुळे शहरात आरटीओचे पथक आल्याचे कळताच वाहनचालक, मालक वाहने लपविण्याचा प्रयत्न करतायत.

असाच प्रकार एका चालकाने कार लपविण्यासाठी केला. आरटीओ पथकाला चकवा देण्यासाठी त्याने महाबळेश्वरच्या गल्लीबोळातून सुसाट कार पळवली. पण आरटीओच्या वाहतूक निरीक्षकांनी त्याचा पाठलाग करून अखेर त्याला ताब्यात घेतलं. याप्रकरणी कारचालक अजमुद्दीन वलगे याला १ लाख ९० हजार रुपयांचा दंड बजावण्यात आला आहे. तसेच वाहन चालवण्याचा परवाना सहा महिन्यांसाठी रद्द केला आहे. ही कारवाई प्रादेशिक परिवहन अधिकारी वाहतूक निरीक्षक आफरीन मुलाणी यांनी केली.
महाबळेश्वरच्या जंगलात मादी रानगव्याचा मृत्यू, प्रसूतीदरम्यान दुर्दैवी अंत झाल्याने हळहळ
इराणी पेट्रोल पंपाजवळ सकाळच्या सुमारास परिवहन विभागाचे (RTO) वाहन पाहताच कार चालकाने (एमएच ११ बीडी ८२८२) पोबारा करण्याचा प्रयत्न केला. ही बाब वाहतूक निरीक्षक आफरीन मुलाणी यांच्या लक्षात आली. अधिकारी मुलानी यांना संशय आल्याने त्यांनी त्या कारचा पाठलाग केला. कारचालकाने शहराच्या गल्लीबोळातून कार भरधाव पळवण्याचा प्रयत्न केला. यावेळी भरधाव कारने एका दुचाकीला धडक दिली. या धडकेमध्ये कारचा पुढील टायर पंक्चर झाल्याने वेग कमी झाला आणि पाठीमागून आलेल्या वाहतूक निरीक्षक आफरीन मुलाणी यांनी चालकाला पकडलं. त्याच्याकडे अधिक चौकशी करून त्याला महाबळेश्वर आगारात नेलं. तेव्हा कारचा सहा वर्षे वाहन कर थकीत होता. यामुळे चालकाला कारसह ताब्यात घेतले. वाहन चालकाला तब्बल १ लाख ९० हजार रुपयांचे चलान दिले. तसेच कारचालकाचा परवाना सहा महिन्यांसाठी रद्द करून वाहन जप्त केलं.