उदयनराजे भोसलेंना अंतरिम जामीन मंजूर

मटा ऑनलाइन वृत्त। सातारा

खंडणी आणि मारहाणीच्या आरोपाखाली अटक करण्यात आलेले राष्ट्रवादी काँग्रेसचे खासदार उदयनराजे भोसले यांना कोर्टाने अंतरिम जामीन मंजूर केला आहे. उदयनराजे भोसले यांच्या अटकेनंतर सातारा शहरात उत्स्फूर्तपणे बंद पाळण्यात आला. या पार्श्वभूमीवर कायदा आणि सुव्यवस्थेचा प्रश्न उद्भवू नये यासाठी कोर्टाने खासदार उदयनराजे यांना अंतरिम जामीन मंजूर केला आहे.

उदयनराजे यांना आज सकाळी अटक झाली होती. शासकीय विश्रामगृहात वैद्यकीय तपासणी केल्यानंतर त्यांना कोर्टात हजर केले जाणार होते. मात्र कायदा आणि सुव्यवस्थेचा प्रश्न निर्माण होण्याची शक्यता लक्षात घेता त्यांना कोर्टात हजर केले गेले नाही.

उदयनराजे भोसले यांना अटक होण्याची शक्यता निर्माण झाल्यानंतर सातारा शहरात तणावाचे वातावरण पसरले होते. उदयनराजे यांनी अटकपूर्व जामीनासाठी अर्जही केला होता. मात्र कोर्टाने त्यांचा जामीन अर्ज फेटाळला. त्यानंतर शुक्रवारी रात्री उदयनराजे हजारो समर्थकांसह साताऱ्यात जोरदार एंट्री केली. यावेळी उदयनराजे यांचे हजारो समर्थक रस्त्यावर उतरल्याचे दिसून आले होते.

याबरोबरच, शिवप्रतिष्ठानचे संस्थापर संभाजी भिडे गुरूजी, राष्ट्रवादी काँग्रेस पक्षाचे आमदार जितेंद्र आव्हाड, काँग्रेसचे खासदार राजीव सातव आणि खासदार संभाजीराजे छत्रपती यांनीही उदयनराजे यांना पाठिंबा दिला. उद्यनराजेंना अटक झाल्यास संपूर्ण महाराष्ट्र पेटून उठेल आणि रस्त्यावर येईल असा इशारा संभाजी भिडे गुरूजी यांनी दिला.

उदयनराजेंना अटक झाल्यानंतर सातारा शहरात उत्स्फूर्तपणे बंद पाळण्यात आला. या बंदमध्ये अनेक व्यापारीही सहभागी झाले होते. शिवाय शहरातील शाळाही बंद ठेवण्यात आल्या होत्या.