रामराजे निंबाळकर राष्ट्रवादी सोडणार; पण जाणार कुठे?

फलटण: राष्ट्रवादी काँग्रेसचे ज्येष्ठ नेते व विधान परिषदेचे सभापती रामराजे नाईक निंबाळकर यांचा राष्ट्रवादीला सोडचिठ्ठी देण्याचा निर्णय पक्का झाला आहे. मात्र, राष्ट्रवादी सोडल्यानंतर कोणत्या पक्षात जायचे? भाजप की शिवसेना?, असा पेच त्यांच्यापुढं आहे. प्रमुख कार्यकर्त्यांच्या आज होणाऱ्या बैठकीत याबाबत निर्णय होणार असल्याचं समजतं.

साताऱ्याचे आमदार शिवेंद्रराजे भोसले यांच्यानंतर आता रामराजे राष्ट्रवादीला रामराम ठोकणार आहेत. ते भाजपमध्ये प्रवेश करणार असल्याची चर्चा सुरुवातीला होती. मात्र, जिल्ह्याच्या राजकारणात त्यांना त्रासदायक ठरत असलेले खासदार उदयनराजे भोसले हे सुद्धा भाजपमध्ये जाण्याच्या तयारीत आहेत. राष्ट्रवादी काँग्रेसमध्ये या दोन्ही नेत्यांचे कधीही पटले नाही. अनेक शरद पवारांना त्यांच्या वादात मध्यस्थी करावी लागली. दोघेही भाजपमध्ये गेल्यास पुन्हा पक्षांतर्गत स्पर्धा वाढण्याची शक्यता आहे. त्यामुळं रामराजे शिवबंधन बांधण्याचा विचार करत असल्याचे समजते.

सातारा जिल्ह्यात शिवसेनेकडे मोठे नेतृत्व नाही. त्या पक्षात गेल्यास रामराजेंच्या नेतृत्वास अधिक वाव मिळण्याची शक्यता आहे. त्यामुळं ते शिवसेनेचा पर्याय निवडण्याची अधिक शक्यता आहे. याबाबत निर्णय घेण्यासाठी त्यांनी आज प्रमुख कार्यकर्त्यांच्या मेळाव्याचं आयोजन केलं आहे. या मेळाव्यात ते नव्या घरोब्याची घोषणा करणार आहेत. त्यांनी कोणताही पर्याय निवडला तरी राष्ट्रवादीला धक्का बसणार हे निश्चित आहे.