गणेश तलावात मृतदेह सापडला
मिरज :
शहरातील शनिवार पेठ केदार अपार्टमेंट येथे राहणारे बब्रु शिवय्या स्वामी (वय ६५) हे दोन दिवसांपूर्वी घरातून निघून गेले होते. त्यांचा मृतदेह शुक्रवारी गणेश तलावात आढळून आला. बब्रु स्वामी बेपत्ता असल्याची फिर्याद मिरज शहर पोलिसात नोंद झाली होती.
बब्रु स्वामी ३० ऑक्टोबर २०१९ पासून घरातून कोणास काही न सांगता निघून गेले होते. घरातील सर्वांनी त्यांची शोधाशोध केली. परंतु कुठेच मिळून आले नाहीत. या बाबत त्यांचा मुलगा प्रकाश बब्रु स्वामी यांनी मिरज शहर पोलिसात बेपत्ता असल्याची फिर्याद दिली होती. शुक्रवारी दुपारच्या दरम्यान गणेश तलावामध्ये मृतदेह तरंगत होता. शवविच्छेदनानंतर मृतदेह नातेवाईकांच्या ताब्यात देण्यात आला.
..........
बेकायदा सिलिंडरचा साठा जप्त
कराड :
तळबीड पोलिस ठाण्याचे हद्दीत वराडे गावात लोकवस्तीमध्ये बेकायदा भारत गॅसचे गॅस सिलिंडरचा (टाक्यांचा ) विनापरवाना असुरक्षितपणे साठा करून ठेवल्याची माहिती मिळाली होती. पोलिसांनी छापा टाकला असता एकूण १६२ घरगुती व व्यवसायीक गॅस सिलिंडर आढळून आले. जप्त केलेल्या सिलिंडरती किंमत ५७,८२८ रुपये आहे. सिलिंडरचा साठा करून ठेवणाऱ्यांचे नाव नारायण जगन्नाथ कारंडे (ढेबेवाडी) आणि अंकुश रामचंद्र हजारे (वराडे) असे आहे. सदरचा साठा विनापरवाना व बेकायदा असल्याचे मान्य केल्यामुळे पुरवठा अधिकारी विकास गभाले यांनी तळबीड पोलिस ठाण्यात गुन्हा नोंदविण्यात आला आहे.
...........
विषबाधेमुळे बिबट्याचा मृत्यू
कराड : तुळसण (ता. कराड) येथील एका शिवारात अन्नातील विषबाधेमुळे अत्यवस्थ झालेल्या बिबट्याचा अखेर उपचारादरम्यान मृत्यू झाला. बिबट्याला विषबाधा कशामुळे झाली या मागील नेमके कारण वन विभागाला सापडले नाही. बिबट्याला सर्पदंशाने विषबाधा झाली नसल्याचे त्याच्या उत्तरीय तपासणीवरून स्पष्ट झाल्याने त्याची अन्नातून विषबाधा करून हत्या करण्यात आली का? याची चौकशी करून दोषींना कडक शिक्षा करण्यात यावी, अशी मागणी प्राणीमित्रांमधून होत आहे. बुधवारी सायंकाळी सहाच्या सुमारास एक बिबट्या तडफडत असल्याचे तेथील काही ग्रामस्थांच्या निदर्शनास आले होते. वन विभागाने तातडीने त्याच्यावर उपचार सुरू केले. मात्र, उपचारादरम्यान त्याचा मृत्यू झाला.