Nitesh Rane: नितेश राणे यांचा कणकवली तालुक्यातील प्रवेशाचा मार्ग मोकळा

सुरेश कोलगेकर, सिंधुदूर्ग: संतोष परब हल्लाप्रकरणामुळे सिंधुदुर्गात प्रवेशबंदी असलेले भाजप आमदार नितेश राणे यांना आता दिलासा मिळाला आहे. कणकवलीत दिवाणी न्यायालयात बुधवारी त्यांच्यावर दोषारोपपत्र दाखल करण्यात आले. आरोपपत्र दाखल होईपर्यंत न्यायालयाने नितेश राणे (Nitesh Rane) यांना जिल्ह्यात प्रवेश करण्यास मनाई केली होती. मात्र, आता आरोपपत्र दाखल झाल्याने नितेश राणे कणकवलीत जाऊ शकणार आहेत. तपास अधिकारी कणकवली पोलिस ठाण्याचे पोलिस निरीक्षक सचिन हुंदळीकर यांनी हे दोषारोपपत्र कणकवली न्यायालयात दाखल केले .

घटनेच्या ९० व्या दिवशी हे दोषारोपपत्र न्यायालयात आज दाखल केले आहे. त्यामुळे भाजपा आमदार नितेश राणे यांच्यासह संदेश उर्फ गोट्या सावंत,आणि नितेश राणेंचे स्वीय सहाय्यक राकेश परब यांचा कणकवली तालुक्यातील प्रवेशाचा मार्ग मोकळा झाला आहे. शिवसैनिक संतोष परब हल्ला प्रकरणी जिल्हा न्यायालयाने आमदार नितेश राणे, संदेश उर्फ गोट्या सावंत आणि राकेश परब यांना जामीन देतांना जोपर्यंत या प्रकरणाचे दोषारोपपत्र न्यायालयात पोलीस दाखल करत नाहीत तोपर्यंत आरोप असलेल्या या तिघांनीही कणकवली तालुक्यात प्रवेश करू नये असे आदेश दिले होते.

संतोष परब हल्लाप्रकरणात आमदार नितेश राणे आणि त्यांचे खासगी सचिव राकेश परब यांना प्रमुख जिल्हा व सत्र न्यायाधीश एस.व्ही. हांडे यांच्या न्यायालयाने जामीन मंजूर केला होता. यावेळी या दोघांनाही अटी व शर्ती घालून देण्यात आल्या होत्या. न्यायालयाने या दोघांचीही प्रत्येकी तीस हजार रुपयांच्या जामिनावर मुक्तता केली होती.