सोलापुरात होणार
अॅडव्हेंचर पार्क
सोलापूर :
सोलापूर शहराचा स्मार्ट सिटीत समावेश झाल्यानंतर केंद्र सरकारच्या निधीतून मोठ्या प्रमाणावर कामे सुरू आहेत. रंगभवन चौकातील पब्लिक प्लाझा आणि हुतात्मा बागेच्या नूतनीकरणामुळे शहराच्या सौंदर्यात भर पडली आहे. आता सिद्धेश्वर मंदिराच्या शेजारी अॅडव्हेंचर पार्क होणार आहे.
सुमारे ४ कोटी ३४ लाख रुपये खर्चून जुलै २०१८ मध्ये सुरू करण्यात आलेल्या या अॅडव्हेंचर पार्कचे कामही अंतिम टप्यात आले आहे. रेनवॉटर हार्वेस्टिंगसह वॉकिंग ट्रॅक, नर्सरी, लहान मुलांना खेळण्यासाठीचे साहित्य, बगीचा आदींचा यामध्ये समावेश आहे. साहसी खेळाचे प्रात्यक्षिक या पार्कमध्ये उपलब्ध करून देण्यात आले आहे. या शिवाय वाचनालय, अद्ययावत लायटिंग व साउंड सिस्टिम आदी साधनांचा समावेश असल्याने या पार्कबाबत बच्चे कंपनींना अधिकच उत्सुकता लागून राहिली आहे.