अंगणवाडी सेविकांचा मोर्चा
सोलापूर :
अंगणवाडी सेविकांनी वाढीव आणि दोन महिन्यांपासून न मिळालेले मानधन मिळावे, या प्रमुख मागणीसह आपल्या विविध मागण्यांसाठी सोलापूर जिल्ह्यातील अंगणवाडी सेविकांनी जिल्हाधिकारी कार्यालयासमोर धरणे आंदोलन केले. या वेळी हजारो अंगणवाडी सेविकांनी सरकारच्या विरोधात जोरदार घोषणाबाजी केली.
शुक्रवारपासून पोषण आहार वगळता अन्य कामांवर बहिष्कार घालण्याचा निर्णय संघटनेने घेतला आहे. अंगणवाडी सेविकांना मोबाइलवर काम करण्याची सक्ती रद्द करावी, त्या बदल्यात लॅपटॉप द्यावा. पंतप्रधान नरेंद्र मोदी यांनी ११ सप्टेंबर २०१८ला अंगणवाडी कर्मचाऱ्यांच्या मानधनात वाढ जाहीर केली होती. मात्र, त्याची अंमलबजावणी राज्य सरकारने अद्याप केली नाही. गेल्या दोन महिन्यांपासून मानधनदेखील मिळाले नाही. त्यामुळे अंगणवाडी सेविकांवर उपासमारीची वेळ येत आहे. ११ जूनला बालविकास मंत्री पंकजा मुंडे यांनी पेन्शनची घोषणा केली होती. टीएचे थकीत पैसे देण्यात यावेत आदी मागण्यांसाठी अंगणवाडी सेविकांनी शुक्रवारी मोर्चा काढला. या वेळी महाराष्ट्र राज्य अंगणवाडी सेविका कर्मचारी संघाच्या प्रदेश उपाध्यक्षा सूर्यमणी गायकवाड यांच्या नेतृत्वाखाली विविध मागण्यांचे निवेदन जिल्हाधिकारी डॉ. राजेंद्र भोसले यांनी देण्यात आले.