जादा वसुली केल्यास हॉटेलांवर कारवाई: बापट

मटा ऑनलाइन वृत्त । पंढरपूर

हॉटेल आणि मॉल्समधील खाण्याच्या पदार्थांवरील जीएसटीचे दर कमी करण्यात आले आहेत. त्यामुळे हॉटेल आणि मॉल चालकांनी हॉटेलमध्ये त्वरीत नवीन दरपत्रक लावावेत. जुन्या दरपत्रकानुसार ग्राहकांकडून जादा वसुली केल्यास हॉटेल आणि मॉल चालकांवर कारवाई करण्यात येईल, असा इशारा अन्न व नागरी पुरवठा मंत्री गिरीश बापट यांनी दिला.

पंढरपूर येथे पत्रकारांशी संवाद साधताना गिरीश बापट यांनी हा इशारा दिला. ते म्हणाले,'एसी-नॉन एसी हॉटेलातील खाण्यावरील जीएसटी १८ टक्क्यांवरून ५ टक्के करण्यात आली आहे. हे नवे दरही लागू झाले आहेत. मात्र हे नवे दर लागू न करता ग्राहकांची लूट केल्यास हॉटेल मालकांवर कारवाई करण्यात येईल.'

'नवी दरपत्रक लवकरात लवकर तयार करणं शक्य नसल्यास हॉटेल मालकांनी नवं दरपत्रक येईपर्यंत हॉटेलच्या फलकावर नवीन दर लावण्यात यावेत,' अशा सुचनाही त्यांनी केल्या. मात्र नवीन दरपत्रक बनविले नाही तर कारवाई करण्यात येणार असल्याचंही त्यांनी सांगितलं. दरम्यान, एमआरपीवर कोणताही कर आकारला जात नाही. जर दुकानदार किंवा मेडिकलवाले एमआरपी पेक्षा अधिक दर वसूल करत असतील तर त्यांच्याविरोधात कारवाई करण्यात येणार असल्याचंही त्यांनी सांगितलं.

केंद्र सरकारही कारवाईच्या तयारीत

राज्यसरकार पाठोपाठ केंद्र सरकारनेही ग्राहकांकडून जादा वसुली करणाऱ्या ग्राहकांवर कारवाई करण्याची तयारी सुरू केली आहे. नफेखोरी विरोधी कायद्यांतर्गत हॉटेलमालकांवर कारवाई करण्याचा केंद्र सरकारनं विचार सुरू केला आहे. खाद्यपदार्थांवरील जीएसटी दर कमी केल्यानंतरही त्याची अंमलबजावणी होताना दिसत नाही. त्यामुळेच कठोर कारवाईचं पाऊल उचलण्यात येणार असल्याचं केंद्रीय अर्थमंत्रालयाच्या वरिष्ठ अधिकाऱ्याने 'टाइम्स ऑफ इंडियाला' सांगितलं.