बार्शी निर्भया प्रकरण: आई म्हणते - मोठ्या मुलीवरही अत्याचार, पेट्रोल ओतून जाळण्याचा प्रयत्न

सोलापूर: सोलापुरातील बार्शी तालुक्यात ५ मार्च आणि ६ मार्च रोजी एक धक्कादायक घटना घडली होती. येथे एका अल्पवयीन आणि बारावीचे शिक्षण घेत असलेल्या मुलीवर अत्याचार करण्यात आला. त्यानंतर पोलीस तक्रार का केली याचा राग मनात धरून पीडितेवर कोयत्याने खुनी हल्ला करून तिला ठार मारण्याचा प्रयत्न करण्यात आला. याबाबत बार्शी शहर आणि बार्शी ग्रामीण पोलीस ठाण्यात गुन्हा दाखल झाला आहे. शिवसेनेचे खासदार संजय राऊत यांनी देखील पीडित मुलीचा फोटो ट्वीट करत राज्य शासनावर टीका केली होती. याबाबत पीडित मुलीच्या आईने एक धक्कादायक माहिती दिली आहे. यांना दोन मुली आहेत. मोठ्या मुलीवर देखील असाच अत्याचार करून, तिच्यासोबत लग्न करून, तिला ठार मारण्याचा प्रयत्न करण्यात आला होता.

बेडरूममध्ये गेली, पलंगावरील चादर बदलणार तेवढ्यात तिला तो दिसला अन्...
मोठ्या मुलीसोबत असेच घडले

बार्शी निर्भया प्रकरणात धक्कादायक माहिती समोर आली आहे. पीडित निर्भयाच्या आईने माहिती देताना सांगितले की, काही महिन्यांपूर्वी माझ्या मोठ्या मुलीसोबतही अशीच घटना घडली होती. त्यामध्ये संशयित आरोपींनी चलाखपणा करत माझ्या मुलीसोबत लग्न करण्याचं नाटक करून तिला माझ्या पासून दूर केलं. त्यांचं शिक्षण थांबवलं. त्यानंतर काही दिवसांनी किरकोळ कारणावरून भांडण करत तिच्यावर पेट्रोल टाकून तिला जाळून ठार मारण्याचा प्रयत्न केला. बार्शी पोलीस ठाण्यात याबाबत गुन्हा देखील झाला आहे. बार्शी पोलिसांनी संशयित आरोपीला अटक करून कारवाई केली आहे. पण, तरी संशयित आरोपी जामिनावर मोकाट फिरत आहेत.


बारावीची परीक्षा सुरू असताना, दुसऱ्या मुलीवर अत्याचार आणि खुनी हल्ला

पीडित निर्भयाच्या आईने माहिती देताना सांगितले, ५ मार्च रोजी माझ्या मुलीवर ट्युशनहुन येताना बलात्कार झाला. अक्षय माने आणि नामदेव दळवी या दोघांविरोधात बलात्कार केल्याची तक्रार बार्शी शहर पोलीस ठाण्यात दिली होती. त्यानंतर लगेच दुसऱ्या दिवशी सायंकाळी ६ मार्च रोजी सायंकाळी संशयित आरोपींनी पीडित मुलीवर कोयत्याने हल्ला केला. संशयित आरोपींना वेळीच अटक केली असती तर, माझ्या मुलीवर हा जीवघेणा हल्ला झाला नसता. माझ्या मुलीची बोटे तोडण्यात आली असून तिला कायमचे अपंगत्व आले आहे. पोलिसांत तक्रार देण्यासाठी गेले असता आम्हाला ताटकळत बसविण्यात आले, अशी धक्कादायक माहिती पीडितेच्या आईने दिली आहे. माझ्या मुलीचे बारावीचे बायोलॉजी आणि भूगोल हे पेपर होते. पण घटनेनंतर तिचं शैक्षणिक नुकसान झालं आहे. त्याची भरपाई कोण देणार असा सवाल देखील पीडितेच्या आईने उपस्थित केला आहे.

दहावीचा अखेरचा पेपर झाला की उचलायचं अन्; चपलेच्या दुकानात विद्यार्थ्याच्या हत्येचा कट, पण...
राज्य शासनाने आणि देवेंद्र फडणवीसांनी जातीने लक्ष घालावं; पीडितेच्या आईची आर्त हाक

मुख्यमंत्री एकनाथ शिंदे, गृहमंत्री देवेंद्र फडणवीसांनी यामध्ये जातीने लक्ष घालावे. जलदगती न्यायालयात हा खटला चालवून संशयित आरोपींना कडक शिक्षा द्यावी. खासदार संजय राऊत यांनी आमच्या समर्थनार्थ आवाज उठविला होता, त्यावर देखील गुन्हा दाखल करण्यात आला आहे. त्यांचा आवाज दाबण्याचा प्रयत्न केला गेला आहे. राज्यशासनाने असे न करता आम्हाला न्याय द्यावा, माझ्या दोन्ही मुलींवर अन्याय झाला आहे, दोन्ही मुलींना न्याय द्यावा, अशी मागणी पीडित मुलीच्या आईने केली आहे.