म. टा. वृत्तसेवा, पंढरपूर
पारधी समाजाच्या पाच आरोपींनी शनिवारी रात्री अडीचच्या सुमारास करमाळ्यातील तुरुंग फोडून पळून जाण्याचा प्रयत्न केला. बंदोबस्तावर असलेल्या गार्डनी दोन आरोपींना पकडले असले मात्र, उरलेले तीन आरोपी पळून जाण्यात यशस्वी झाले. घटनेची माहिती मिळताच पोलिस अधीक्षक विरेश प्रभू आणि इतर अधिकाऱ्यांनी जेलला भेट देऊन पाहणी केली. फरार आरोपींच्या शोधासाठी पोलिसांची पाच पथके रवाना झाली आहेत. स्थानिक पोलिस परिसरातील उसाच्या फडात आरोपींचा शोध घेत आहेत.
तुरुंग तोडून पळून गेलेले तीनही आरोपी चोऱ्या आणि दरोड्याच्या प्रकरणातील असून, पोलिसांनी सर्वत्र सावधानतेचा इशारा दिला आहे. सोलापूर आणि नगर जिल्ह्यात अनेक दरोड्यांचा गुन्ह्यासंदर्भात या आरोपींकडून चौकशी सुरू होती. एक घरफोडी आणि एका दरोड्याच्या गुन्ह्यात हे तीनही आरोपी करमाळा येथील तुरुंगात न्यायालयीन कोठडीत होते. सुनील शिवाजी काळे, राजा आकाश काळे आणि अनिल संभाजी काळे हे दरोडेखोर पळून गेले आहेत.