डॉ. कोटणीसांच्या उपकारांना साठ वर्षांनंतरही जागला चीन

मुंबई : सोलापुरातील पाणीटंचाईला तोंड देण्यासाठी मदत म्हणून चीनने महापालिकेला ३० लाख रुपयांची मदत दिल्याची माहिती मुख्यमंत्री देवेंद्र फडणवीस यांनी दिली. डॉ. द्वारकानाथ कोटणीस यांचे मूळ गाव सोलापूर असल्याने जुन्या ऋणानुबंधांना जागत चीनने ही मदत देऊ केली आहे.
सोलापूरसह राज्यामध्ये यंदा पाण्याची तीव्र टंचाई जाणवत आहे. या परिस्थितीमुळे नागरिकांना होणाऱ्या त्रासाची दखल घेऊन चिनी दूतावासाने याबाबतची माहिती चीन सरकारला कळविली होती. डॉ. कोटणीसांनी चीनसाठी केलेल्या त्यागाची आठवण ठेवत त्यांच्या सोलापूर या मूळ गावासाठी मदत करण्याचा निर्णय चीन सरकारने घेतला. त्यानुसार सोलापूर शहरात हातपंपासह ५० कूपनलिका खोदण्यासाठी महानगरपालिकेला ३० लाख रुपयांची मदत करण्याचा निर्णय घेण्यात आला.
सन १९३८ मध्ये झालेल्या चीन-जपान युद्धात मूळचे सोलापूरचे असललेल्या डॉ. द्वारकानाथ कोटणीस यांनी चीनमध्ये जाऊन वैद्यकीय सेवा दिली होती. आपल्या प्रकृतीची काळजी न करता डॉ. कोटणीस यांनी तेथील जखमींवर उपचार केले होते. त्यामुळे सोलापूरबाबत चीनच्या मनात एक हळवा कोपरा आहे.